web counter
LEXO PA REKLAMA!

SHKARKO APP

App Store
Google Play

E fundit!

x

Ekspertët e PD-së, një tjetër dosje voluminoze për inceneratorët/ Këlliçi: Faktet që do të ndihmojnë SPAK-un

18 Tetor 2023, 15:00, Aktualitet CNA

Ekspertët e PD-së, një tjetër dosje voluminoze për

Ekspertët e PD-së kanë dorëzuar në SPAK një tjetër dosje voluminoze për aferën e inceneratorëve.

Dosja përmban 653 faqe që kanë fakte për aferën e inceneratorëve. Ish-kandidati për kryetar bashkie të Tiranës, Belind Këlliçi në një deklaratë për mediat është shprehur se në dosje ka një sërë komunikimesh elektronike mes palëve që dëshmojnë aferën e inceneratorëve.

Këlliçi ka deklaruar se do t’i shkojnë deri në fund kësaj afere që ka si përfitues sipas tij kryeministrin Edi Rama dhe kryebashkiakun Erion Veliaj.

"Sot po i përcjellim zyrtarisht z. Altin Dumani, një material të plotë (653 faqe), produkt i një pune voluminoze 4-mujore nga Grupi i Ekspertëve të Partisë Demokratike, për zbardhjen e plotë të aferës korruptive të inceneratorëve.

Në këtë material, grupi i punës ndihmon në mënyrë thelbësore për hetimin e kësaj çështjeje, sidomos lidhur me deklarimet e rreme të dhëna në letër-porositë, nga aksionerët e sotëm. Këtë material po ia përcjellim në mënyrë urgjente z. Altin Dumani, pasi ne kërkojmë ndalimin e menjëhershëm të financimit të këtij projekti korruptiv, me para të dyshimta, për të cilat i takon SPAK të hetojë nëse janë para të zyrtarëve të veshur me pushtet, apo janë para të grupeve kriminale si Ndragheta, etj.

Sot nuk po bëjmë publik asnjë dokumentacion, pasi besojmë fort se z. Dumani, pas ditës së sotme, do të ndërmarrë veprimet e duhura ligjore deri në zbardhjen e plotë të kësaj afere.

Gjithsesi ju bëjmë me dije se ky material përmban të dhëna autentike si:

• Kontrata të nënshkruara mes palëve.

• Dokumentacion zyrtar të cilin SPAK nuk e ka gjetur pranë institucioneve shqiptare.

• Komunikime elektronike mes palëve si dhe shumë dokumente financiare.

Gjej rastin edhe njëherë, të falënderoj qytetarët e shumtë si dhe gazetarët kurajozë, të cilët për muaj me radhë kanë bashkëpunuar me Grupin e Ekspertëve të ngritur pranë Partisë Demokratike, edhe pse shpeshherë janë përballur me kërcënime dhe baltosje nga makineria e propagandës qeveritare.

Partia Demokratike mbetet e vendosur për t’i shkuar deri në fund kësaj afere korruptive, e cila pa diskutim ka ideatorë dhe përfitues kryesorë dyshen Rama – Veliaj, për të cilët po përgatiten 3 kallëzime të reja pranë SPAK-ut.

Pushteti arbitrar dhe korruptiv i Edi Ramës, mund t’i caktojë kryetarin opozitës, mund t’i caktojë grupin parlamentar, mund t’i mohojë komisionet hetimore parlamentare, por asnjëherë misionin e saj. Ne jemi të vendosur që çështjet publike, të parave të taksapaguesve, t’i ngremë me forcë dhe të kërkojmë zgjidhje nëpërmjet çdo mënyre të ligjshme.

Megaafera e inceneratorëve është vetëm njëra prej tyre", tha Këlliçi./ CNA





Lajmet e fundit nga