web counter
LEXO PA REKLAMA!

SHKARKO APP

App Store
Google Play

E fundit!

x

“Dy republika, një komb, 58 marrëveshje bilaterale me një qëllim”/ Mesazhi i Kurtit: Mund të bëhet më shumë

13 Tetor 2023, 22:04, Aktualitet CNA
“Dy republika, një komb, 58 marrëveshje bilaterale me një
Kryeministri i Kosovës, Albin Kurti

Kryeministri i Kosovës, Albin Kurti ka deklaruar se prej dy vitesh e gjysmë mes Shqipërisë dhe Kosovës janë arritur 58 marrëveshje bilaterale me një qëllim që qytetarët e një kombi të kenë sa më shumë përfitime ekonomike.

Përmes një postimi në rrjetet sociale, Kurti shkruan se falë këtyre marrëveshjeve të arritura, u mundësua lëvizja e lirë e mbi 200 mijë banorëve përmes funksionalitetit të vendkalimeve të veçanta.

Kurti bëri me dije se këtë herë jemi shumë afër jetësimit të kalimit të lirë e pa kontrolle çdo ditë të vitit.

Kryeministri i Kosovës renditi gjithashtu marrëveshjet për lejet e qëndrimit me afat 5 vjeçar, për zyrat doganore të Republikës së Kosovës në Durrës, për shkëmbimet tregtare, për ndërtimin e hekurudhës Durrës-Prishtinë , për aplikimin dhe regjistrimin e studentëve në universitete si dhe për abetaren e përbashkët.

Duke renditur këto marrëveshje, Kurti e ka përmbyllur postimin e tij me një mesazh të fortë duke thënë se këto janë arritur por mund të arrihet edhe më shumë.

Postimi i plotë i Albin Kurtit, kryeministrit të Kosovës

Dy republika, një komb. Dy vjet e gjysmë, 58 marrëveshje bilaterale, me një qëllim: më shumë përfitime për qytetarët, më shumë për ekonominë.

Për mbi 200 mijë banorët e brezit tonë të përbashkët kufitar mundësuam lëvizje e lirë duke funksionalizuar 26 vendkalime të veçanta. Kurse për të gjithë, mundësuam kalimin e lirë e pa kontrolle të kufijve gjatë muajve të verës, fundjavave dhe ditëve të pushimeve zyrtare. Aktualisht jemi afër jetësimit të kalimit të lirë e pa kontrolle çdo ditë të vitit.

Krahas lëvizjes nga njëri shtet në tjetrin, lehtësuam edhe qëndrim te njëri dhe tjetri shtet, sepse thjeshtuam procedurat për pajisjen me leje qëndrimi, me afat 5 vjeçar. Hoqëm edhe detyrimin për apostilim të dokumenteve administrative.

Me dy zyra doganore të Republikës së Kosovës në Durrës dhe Porto Romano, fituam qasje në det. Aty bëhet zhdoganimi i të gjitha mallrave me destinacion Kosovën. Kjo u ka ndihmuar drejtpërdrejt bizneseve tona që tashmë kanë kursyer nëntë milionë euro, në të njëjtën kohë që edhe ekonomia e Shqipërisë ka përfituar nga rritje me 50% e dërgesave të Kosovës përmes Portit të Durrësit.

Sivjet shkëmbimet tona tregtare janë më të lartat ndonjëherë, teksa ka edhe tre muaj tjerë deri në përfundim të vitit financiar. Investimet e Shqipërisë në Kosovë gjithashtu janë më të lartat ndonjëherë. Në vitin 2019, ato ishin vetëm 15.2 milion euro, kurse në vitin 2022, u pesëfishuan duke arritur vlerë 79.7 milionë euro.

Kemi nënshkruar marrëveshjen për ndërtimin e hekurudhës Durrës-Prishtinë, që është ndër projektet më të mëdha e më të rëndësishme, si në aspektin ekonomik ashtu edhe kombëtar. Ajo do ta lidhë Kosovën me korridoret, që kalojnë pranë nesh, por nuk janë të lidhura me ne. Do t’i bashkojë edhe më fort ekonomitë tona dhe do të rrisë lëvizshmërinë dhe lidhshmërinë ndërmjet republikave tona.

Ndërkohë që krahas unifikimit të abetares për nxënësit e klasës së parë, njësuam edhe procedurat për aplikim dhe regjistrim të studentëve në universitete, si dhe nisëm punën madhore për Enciklopedinë Shqiptare.

Shumë është bërë. Edhe më shumë duhet bërë./ CNA





Lajmet e fundit nga