Dritë shprese për Mokrën në Pogradec, nis investimi me rrugën

8 Maj 2024, 21:51, Aktualitet CNA

Në Mokrën e Poshtme të Pogradecit ka nisur investimi në infrastrukturë rrugore. Historikisht pa infrastrukturë rrugore, Mokra jo vetëm e ka vuajtur këtë gjë, por gati 50% e popullsisë iku për këtë arsye nga fshati drejt qytetit.

Kryetari i Bashkisë Pogradec, Ilir Xhakolli njoftoi nisjen e punimeve nga Proptishti deri në fshatin e bukur të Bishnicës. Ai tha se investimi është i vonuar por krejtësisht i merituar për Mokrën, një investim që do i hapë një kapitull të ri zonës, fshatit dhe turizmit atje. Krahas investimit në rrugë në dy qendrat e banuara Proptisht dhe Slabimjë do të ketë investim në qendrat e tyre, trotuar dhe ndriçim.

Dritë shprese për Mokrën në Pogradec, nis investimi me

“Do të jetë një rrugë me standarde, sipas standardeve të rrugëve rurale. Në projekt është edhe qendra e njësisë admistrative e cila do të jetë me trotuar dhe ndriçim.

Kjo që po bëjmë me është 6.5 km deri në të dalë të Slabinjës, më pas nga aty ku e lëmë ne fillon projekti "Rrugët e Bardha" deri në Bishnicë. Dhe ky është një lajm i mirë për të dyja njësitë administrative të Mokrës së Poshtme dhe ky vendim është marrë sepse këto njësi kanë edhe numrin më të lartë të popullsisë dhe përveçse iu vijnë në ndihmë këtyre banorëve, i vijmë në ndihmë edhe qytetit sepse këto zona, sidomos Bishnica është zonë mjaft atraktive për zhvillimin e turizmit, kështu që besoj fort që kjo zonë do të marrë një zhvillim. Unë di që kjo rrugë e ka afatin 12 muaj, por unë mendoj që me mirëkuptimin e firmës do ta përfundojë edhe më shpejt. Tani nuk jemi edhe në dimër dhe kam shpresë se punimet do të ecin edhe më shpejt”, tha Xhakolli.

Dritë shprese për Mokrën në Pogradec, nis investimi me

Investimi në 20 km rrugë, që financohet një pjesë nga Bashkia dhe pjesa tjetër me programin e rrugëve të bardha projekt i qeverisë, do ndikojë pozitivisht në ekonominë e banorëve, por edhe në ndaljen e hemorragjisë së largimit të njerëzve. Synimi është që kjo rrugë të lidhet për dalje sa më të shpejt me rrugën Qukës-Qafë Plloçë, ndërsa afati i punimeve është 12 muaj./ CNA