web counter
LEXO PA REKLAMA!

SHKARKO APP

App Store
Google Play

E fundit!

x

Diplomacia, politika dhe drejtësia në fokus/ Zhvillimet e javës së fundit të Majit

25 Maj 2026, 09:15, Aktualitet CNA

Diplomacia, politika dhe drejtësia në fokus/ Zhvillimet e javës

Java e fundit e majit, që shtrihet nga data 25 deri në 31 maj, nis me një intensitet të lartë zhvillimesh, ku në qendër të vëmendjes qëndron vizita zyrtare që Ministri i Mbrojtjes së Greqisë, Nikos Dendias, zhvillon këtë të hënë në Tiranë.

Gjatë ditës, Dendias zhvillon takime të rëndësishme, duke filluar nga Ministria e Mbrojtjes ku ai takohet me homologun e tij, Ermal Nufi. Agjenda vijon me një takim zyrtar dhe drekë pune që ai zhvillon me Kryeministrin Edi Rama, ndërsa pasdite ministri grek pritet nga Kryepiskopi i Tiranës, Durrësit dhe gjithë Shqipërisë, Fortlumturia e Tij, Joani.

Po ashtu më 26 maj në Bruksel mbahet Konferenca Ndërqeveritare Shqipëri-BE, që sipas qeverisë vulos me sukses fazën hyrëse dhe çel fazën përmbyllëse të negociatave të anëtarësimit në union europian.

Në rrafshin opozitar, kryetari i Partisë Demokratike, Sali Berisha vijon takimet me demokratët, pas rikonfirmimit të tij në krye të kësaj force politike në referendumin e zhvilluar të shtunën e 23 majit.

Më pas, Partia Demokratike ka përcaktuar thirrjen e Kuvendit Kombëtar për në datën 30 maj, në orën 11:00. Berisha, i cili ka deklaruar se protesta e radhës do të jetë kryengritja paqësore më e fuqishme që ka njohur vendi, është përqendruar fillimisht në përmbylljen e proceseve të brendshme.

 Këto procese pritet të përmbyllen brenda këtij muaji, duke i hapur rrugë në qershor intensifikimit të aksionit opozitar dhe protestave.

Paralelisht me zhvillimet politike, jeta parlamentare mbetet e ngarkuar. Komisioni për Evropën dhe Punët e Jashtme mblidhet këtë të hënë për të zhvilluar seanca dëgjimore me kandidatët për krerë të misioneve diplomatike, ku dëgjohen zyrtarët e propozuar për përfaqësimin e Shqipërisë në Gjenevë, Suedi, Finlandë, Islandë, Norvegji, Egjipt, Siri, Jordani, Libi, Palestinë, Liban, Sudan dhe Bosnjë-Hercegovinë.

Ndërkohë, në datën 28 maj, Komisioni Posaçëm Parlamentar për Reformën Administrativo-Territoriale do të zhvillojë seancat dëgjimore të radhës me kryetarët e bashkive të qarqeve Berat, Fier dhe Shkodër.

Sistemi i drejtësisë mbetet sërish në qendër të zhvillimeve të javës. Në datën 26 maj, GJKKO zhvillon seancën ndaj kryebashkiakut të Tiranës, Erion Veliaj dhe të bashkëpandehurve të tij, nën drejtimin e trupës gjyqësore të përbërë nga Elsa Ulliri, Flora Hajredini dhe Besmir Stroka. Dy ditë më vonë, në datën 28 maj, kryebashkiaku do të përballet me Gjykatën e Lartë në lidhje me kërkesën për shfuqizimin e masës së sigurisë.

Po ashtu në GJKKO vijon procesi gjyqësor për dosjen "Meta", ku pas ndarjes së çështjes për disa të pandehur, për Ilir Metën dhe Monika Kryemadhin vazhdon gjykimi i zakonshëm. Njëkohësisht, vazhdon gjyqi për dosjen "Partizani" ndaj Sali Berishës, i cili po ashtu paraqitet periodikisht në SPAK në zbatim të masës së sigurisë “detyrim paraqitje”./ CNA





Lajmet e fundit nga