Drogë, alkool dhe telefona/ Kontrolle blic në burgun e Fierit

24 Maj 2026, 12:53, Aktualitet CNA

Kontrolle të befasishme janë zhvilluar në Institucionin e Ekzekutimit të Vendimeve Penale Fier, në kuadër të masave për forcimin e sigurisë dhe parandalimin e futjes së sendeve të ndaluara në burg.

Sipas informacionit zyrtar, kontrollet janë kryer pas të dhënave operative të siguruara nga Drejtoria e Riskut në DPB, në bashkëpunim me Agjencinë e Mbikëqyrjes në Sistemin e Ekzekutimit të Vendimeve Penale.

Gjatë kontrollit të ushtruar nga Forcat Operacionale të DPB-së në ambientet e institucionit, në pjesën e jashtme pranë Godinës “A” janë gjetur dhe sekuestruar 10 telefona celularë, 10 karikues telefonash, bidona të dyshuar me përmbajtje alkoolike, si dhe lëndë e dyshuar narkotike në dy vende të ndryshme.

Gjatë kontrollit të kryer nga strukturat e vetë IEVP Fier, të dënuarit me inicialet A.M., gjatë verifikimit në skaner, iu gjetën pesë qese të vogla të dyshuara me lëndë narkotike, të fshehura në pjesën e poshtme të një bluzeje.

"Nga informacioni i marrë në mënyrë operative nga Drejtoria e Riskut në DPB, në bashkëpunim me Agjencinë e Mbikëqyrjes në Sistemin e Ekzekutimit të Vendimeve Penale, kontrollet për forcimin e masave të sigurisë dhe parandalimin e futjes apo mbajtjes së sendeve të ndaluara kanë vijuar në Institucionin e Ekzekutimit të Vendimeve Penale Fier.

Në kuadër të këtyre masave, Forcat Operacionale të DPB-së kanë ushtruar kontroll në ambientet e institucionit, ku në pjesën e jashtme pranë Godinës “A” janë konstatuar dhe sekuestruar: 10 telefona celularë, 10 karikues telefonash, bidona të dyshuar me përmbajtje alkoolike, si dhe lëndë e dyshuar narkotike e gjetur në dy vende të ndryshme.

Për rastin janë hartuar raportet përkatëse të incidentit dhe procesverbalet e bllokimit, ndërsa është njoftuar Agjencia e Mbikëqyrjes në Sistemin e Ekzekutimit të Vendimeve Penale për ndjekjen e procedurave të mëtejshme.

Ndërkohë, gjatë një kontrolli të kryer nga strukturat e vetë IEVP Fier, të dënuarit A.M., gjatë verifikimit në skaner, iu konstatuan pesë qese të vogla të dyshuara me lëndë narkotike, të fshehura në pjesën e poshtme të një bluzeje. Pas konstatimit, janë njoftuar drejtuesit e institucionit dhe specialistët e Agjencisë, ndërsa i dënuari është shoqëruar në veçim", thuhet në njoftim./ CNA