E fundit!

11:24 Aktualitet

SPAK merr të pandehur ish-kryebashkiakun socialist

SPAK ka marrë të pandehur ish-kryebashkiakun socialist të ...

Deklarata e Ramës ndez polemika në Athinë/ Kryeministri u përgjigjet “të shqetësuarve”

16 Janar 2026, 14:33, Aktualitet CNA

Deklarata e Ramës ndez polemika në Athinë/ Kryeministri u

Kryeministri Edi Rama ka reaguar në lidhje me komentet ndaj tij nga mediat greke dhe politikanët për deklaratën gjatë Samitit të Zhvillimit të Qëndrueshëm në Abu Dhabi ndaj gazetarit greko-amerikan John Defterios, të cilit i është drejtuar me fjalët “Mendon se je trashëgimtar i Platonit dhe Aristotelit, por nuk je…”

Përmes një reagimi në platformën “X”, Rama thekson se është e pabesueshme se një fjali e thënë me humor të shkëputet nga konteksti dhe të kthehet në polemikë publike me pathos nacionalist, gjë që fatkeqësisht në Athinën mediatike ndodh shpesh!

Por Rama qetëson "të lënduarit" nga kjo deklaratë duke thënë se nuk ka asnjë dyshim që Platoni dhe Aristoteli janë filozofë grekë dhe që Greqia e Lashtë është shtrati i qytetërimit europian; që kultura greke meriton vetëm admirim, jo vetëm për filozofët e lashtësisë, por edhe për poetët, shkrimtarët, kineastët e muzikën që i ka dhënë njerëzimit.

Kryeministri shkruan se populli grek për të është një fqinj i pazëvendësueshëm e vëlla i patjetërsueshëm i popullit shqiptar dhe që për kryeministrin e Greqisë ka një respekt të veçantë.

“Jam i mahnitur nga reagimi i disa mediave në Athinë e i ndonjë politikani të lodhur grek lidhur me tonet e mia aspak tendencioze, po me humor miqësor gjatë bashkëbisedimit me gazetarin e nderuar John Defterios në panelin e organizuar gjatë Samitit të Zhvillimit të Qëndrueshëm në Abu Dhabi!

Është e pabesueshme që një fjali e thënë me humor, të shkëputet totalisht nga konteksti e të kthehet në polemikë publike me pathos nacionalist, gjë që fatkeqësisht në Athinën mediatike ndodh shpesh!

Por i siguroj të gjithë të shqetësuarit e të lënduarit, se nuk kam as më të voglin dyshim që Platoni dhe Aristoteli janë filozofë grekë dhe që Greqia e Lashtë është shtrati i qytetërimit europian; që kultura greke meriton vetëm admirim, jo vetëm për filozofët e lashtësisë po edhe për poetët, shkrimtarët, kineastët e muzikën që i ka dhënë njerëzimit; që Greqia është një vend për të cilin unë ushqej ndjenjat më pozitive, që populli grek është për mua një fqinj i pazëvendësueshëm e vëlla i patjetërsueshëm i popullit shqiptar dhe që për kryeministrin e Greqisë ushqej një respekt të veçantë!

U kuptuam? Shpresoj po.

Por ama mos më kërkojë askush ndër të shqetësuarit dhe të lënduarit me humorin tim, që kush shkruan e flet greqisht me pathosin nacionalist të të larpërmendurve, të më duket si pasardhës i Platonit dhe Aristotelit!

Kaq”, shkruan Rama./ CNA