Basha nuk i ndahet refrenit/ Këtë herë e përsërit në takimin me një grusht njerëzish në Sarandë

23 Korrik 2023, 18:21, Aktualitet CNA

Basha nuk i ndahet refrenit/ Këtë herë e përsërit

Ish kryetari i PD-së së vulës që synon të marrë sërish drejtimin e partisë, Lulzim Basha po përsërit të njëjtin refren në çdo takim të tijin që bën me një grusht njerëzish.

Basha po ngul këmbë që të bëhet vetting i politikanëve për të ç’rrënjosur sipas tij modelin e baltosjes .

Po ashtu nuk lë pa përmendur hapjen e listave duke thënë se është garancia për krijimin e një qeverie dhe Parlamenti që do të jetë në shërbim të qytetarëve.

Gjithashtu shfaqet i shqetësuar duke deklaruar se pas legalizimit të vjedhjes përmes Inceneratorëve, check-up, tenderave dhe koncesioneve korruptive po i hapet rrugë legjitimimit të kanabisit për llogari të grupeve kriminale.

“Sot Shqipëria e ka nevojë jetike pastrimin e politikës, ndarjen e saj me krimin dhe largimin nga sistemi i politikanëve të korruptuar.

Vetting-u i politikanëve është edhe mënyra për të çrrënjosur modelin e baltosjes, duke treguar me fakte se kush është i korruptuar e kush jo, kush është peng e kush jo, kush është i lidhur me krimin e kush jo, kush mbron interesat e oligarkëve e kush jo.

Nuk është e lehtë, por është dëshmia e parë e cila ndan ata që kanë frikë nga vetting-u, me ata që s’kanë asgjë për të fshehur.

Bashkë me hapjen e listave, ku deputetët i zgjedhin qytetarët dhe jo kryetari, kjo.

Dhe për të ndalur njëherë e mirë kapjen e shtetit, që siç po ndodh sot, pas legalizimit të vjedhjes përmes Inceneratorëve, check-up, tenderave dhe koncesioneve korruptive po i hap rrugë legjitimimit të kanabisit për llogari të grupeve kriminale, apo “burgosjes” për studentët e mjekësisë me ligje anti-kushtetuese.

Partia Demokratike do t’i prijë një aleance gjithëpërfshirëse me të gjithë faktorët shoqërorë, për një projekt ndryshimi që nis me adresimin e çështjeve që mbajnë të bllokuar sistemin politik dhe atë ekonomik:

Listat e hapura;

Vetting-un në politikë;

Kufizimin e mandateve;

Votën e diasporës;

Zgjedhjen e Presidentit nga populli.”, shkruan Basha./ CNA