web counter
LEXO PA REKLAMA!

SHKARKO APP

App Store
Google Play

“Askush nuk është mbi ligjin”/ Dumani: Kemi ngritur akuza ndaj zyrtarëve të lartë dhe grupeve kriminale

12 Dhjetor 2025, 12:56, Aktualitet CNA

“Askush nuk është mbi ligjin”/ Dumani: Kemi ngritur akuza

Kreu në detyrë i SPAK-ut, Altin Dumani, ka zhvilluar një takim me studentët e Universitetit "Aleksandër Moisiu" në Durrës.

Dumani ka theksuar se gjatë këtyre viteve SPAK-u ka zbatuar parimin se askush nuk është mbi ligjin duke hetuar dhe ngritur akuza për zyrtarë të lartë dhe grupe kriminale.

“Për t'u kthyer pak te puna e SPAK-ut gjatë gjashtë viteve të para, jemi përpjekur që veç punës hetimore, të ndihmojmë edhe në ngritjen dhe konsolidimin e institucionit. Zhvillimi dhe konsolidimi kanë kaluar përmes pengesave të shumta. E kemi filluar me një numër të kufizuar prokurorësh në mungesë të Byrosë Kombëtare të Hetimit, por nuk u dekurajuam dhe vazhduam para.

Sot mund të flasim për një strukturë funksionale me përbërje të plotë të prokurorëve, të ndarë në dy seksione: seksioni kundër krimit të organizuar dhe terrorizmit dhe seksioni kundër korrupsionit, me 60 hetues të Byrosë Kombëtare të Hetimit. Gjithashtu, kemi një miniseksion për realizimin e përgjimeve dhe sektorin e hetimit financiar, i cili ka për objektiv identifikimin me qëllim sekuestrimi dhe konfiskimi të produkteve të veprës penale.

Tashmë mund të themi se SPAK-u është në funksionalitet të plotë. Procesi rigoroz i përzgjedhjes së prokurorëve, hetuesve dhe administratës ka dhënë rezultate pozitive në ndërtimin e strukturës. Në vetëm gjashtë vite funksionim, SPAK-u ka arritur të zbatojë parimin se askush nuk është mbi ligjin.

SPAK-u ka ngritur akuza ndaj zyrtarëve të nivelit të lartë, të mesëm dhe të ulët, përfshirë kryetarë bashkish, prefektë, gjyqtarë dhe prokurorë, si dhe funksionarë të lartë të policisë së shtetit. Më shumë se 50% e tyre tashmë janë me vendim fajësie të formës së prerë, ndërsa pjesa tjetër është në gjykim ose hetim.

Këto rezultate tregojnë se SPAK-u është i aftë të vërë para përgjegjësisë penale çdo funksionar, pavarësisht pushtetit politik, fuqisë ekonomike apo financiare që ai zotëron. Nuk është e lehtë, por nuk është e pamundur. Gjithashtu, një prioritet tjetër i institucionit është lufta kundër krimit të organizuar.

SPAK-u ka treguar se është në gjendje të vendosë para përgjegjësisë penale grupe dhe struktura kriminale, të cilat paraqesin rrezikshmëri të madhe jo vetëm për vendin tonë, por edhe për vendet e tjera, si brenda dhe jashtë Bashkimit Europian. Hetimet tona kanë vënë re ndërthurje të krimit të organizuar me korrupsionin, me funksionarë të lartë që ose u shërbejnë organizatave kriminale nëpërmjet korrupsionit, ose janë pjesë aktive të tyre”, tha Berisha./ CNA





Lajmet e fundit nga