web counter
LEXO PA REKLAMA!

SHKARKO APP

App Store
Google Play

Agron Llakaj, dedikim prekës për bashkëshorten e ndjerë/ “Mbetem i pushtuar nga mungesa jote”

24 Korrik 2024, 14:32, Aktualitet CNA
Agron Llakaj, dedikim prekës për bashkëshorten e ndjerë/
Agron Llakaj

Dy muaj më parë, artisti i njohur, Agron Llakaj, humbi bashkëshorten e tij, Kostandinën, nga një sëmundje e rëndë.

Këtë të mërkurë, aktori ka bërë një dedikim prekës për bashkëshorten, ku thekson vështirësitë që po përjeton nga mungesa e saj.

Agron Llakaj deklaron se e ka të vështirë ta pranojë humbjen e saj dhe e ushqen veten me mendimin se do të kthehet.

Dedikimi:

Kalojnë ditët dhe sërish mbetem i pushtuar nga mungesa jote Kostandina… dhe jetën e shikoj krejt ndryshe. Sa i pakuptimtë ky fati ynë?!

Shtyj një ditë, një javë…, sot 2 muaj…, ushqej mendimin se do më kthehesh sërish dhe s’di…, eci rrugës dhe më duket se përpara do më shfaqesh Ti, ke qenë në punë, në bankë a diku... Eci nga liqeni dhe hapat që vijnë mbrapa nga kushdo më ngjajnë me ritmin e hapave të tu…, sa herë instinktivisht kthej kokën…, ul ritmin të të pres..., dhe sërish vetëm. Ulem te vendi ynë në kafene dhe porosis gjithmonë dy, dy gjysma kafe dhe një shishe ujë…

Në shtëpi çdo lëvizje e hapje e mbyllje dere…, me rrëqeth të gjithin..., mos po vjen ti?!- ” Të kam sjellë dy bluza, provoi cila të rri më mirë?!” Më mungon e qeshura jote…, malli më shqyen për zërin tënd në telefon”- he mo Agron?!” Pusho pak, mos rri pa ngrëne…, të të pres apo vonon?!”

E ditët shtyjnë njëra-tjetrën e hëna me diellin vazhdojnë ndërrojnë vendet…, unë jo…, të pres Ty. E si Hachiko jam shndërruar në pritje, në pritje deri në amshim..., nuk kam një vend ku Ty të të pres, në çdo vend më mungon Ti./ CNA





Lajmet e fundit nga