web counter
LEXO PA REKLAMA!

SHKARKO APP

App Store
Google Play

E fundit!

x

Lufta kundër pastrimit të parave/ Balluku: Performancë në rritje, t’u përgjigjemi në kohë kërkesave

24 Korrik 2024, 12:32, Aktualitet CNA
Lufta kundër pastrimit të parave/ Balluku: Performancë në
Zv.kryeministrja, njëherësh Ministrja e Infrastrukturës dhe Energjisë, Belinda Balluku

Zv.kryeministrja, njëherësh ministrja e Infrastrukturës dhe Energjisë, Belinda Balluku, në mbledhjen me anëtarët e Komitetetit të Bashkërendimit të Luftës Kundër Pastrimit të Parave theksoi rëndësinë e forcimit të partneritetit me sektorin privat.

Balluku gjithashtu ka kërkuar vëmendje të shtuar sa u përket 2 masave në planin e punës për agjendën 2024-2030

Ajo ka deklaruar se ka pasur një ndryshim thelbësor të performancës të të gjitha institucioneve pjesë e kësaj tryeze, krahasuar me mbledhjen e dhjetorit të vitit 2023 dhe kjo tregon përgjegjshmërinë për të vazhduar dhe për të rritur nivelin dhe cilësinë e kërkesave që ka vënë Bashkimi Evropian dhe nga MONEYVAL.

“Në hartimin e strategjisë, një vëmendje të veçantë i është dhënë bashkëpunimit të ngushtë me sektorin privat, si bankat, noterët, audituesit, ndërmjetësusesit, zyrat e këmbimit valutor, shoqatat e ndërtueve, të cilët janë angazhuar plotësisht në procesin e hartimit të këtij dokumenti dhe konsultimit të kësaj strategjie në publik.

Vlen të theksohet se përfaqësuesit e sektorit privat janë anëtarë të Grupit Teknik Ndërinstitucional të Punës, i cili është ngritur me vendim të këtij Komiteti në dhjetor të vitit 2023 dhe është një dëshmi e rëndësisë që i kemi dhënë forcimit të partneritetit me sektorin privat, duke u bërë një nga vendet e para në rajon dhe më gjerë padyshim që ka konsoliduar këtë formë partneriteti.

Dokumenti i strategjisë që është paraqitur për miratim është përqendruar në 6 objektiva madhorë të cilët do të përmbushen nëpërmjet masave të detajuara të Planit të Veprimit që shoqëron këtë strategji.  

Gjithashtu do të doja veçanërisht të sillja në vëmendjen tuaj, që miratimi i strategjisë është një nga masat që duhet të përmbushim në kuadër të agjendës së Reformave si pjesë e Planit të Rritjes për Ballkanin Perëndimor. Miratimi i kësaj strategjie do të sjellë përfitimin padyshim për Shqipërinë me vlerë modeste, por që është domethënëse pasi konsolidon procesin. Është një grant prej 1.5 milionë eurosh të cilat akordohen në kuadër të Planit të Rritjes.

Gjatë mbledhjes së fundit të Komitetit, miratuam Vlerësimin Kombëtar të Riskut dhe Planin e Veprimit, në ndërkohë që në mbledhjen e sotme është parashikuar që të vlerësojmë raportin e realizimit për 6-mujorin e parë të këtij plani.

Në zbatim të detyrave të lëna nga Komiteti, është i nevojshëm angazhimi i vazhdueshëm i institucioneve që ju drejtoni për realizimin e planeve të veprimit që janë pjesë e vlerësimit të MONEYVAL dhe të vlerësimit nga Komisioni Evropian, por edhe sigurisht për përfitimin e grantit i cili na akordohet në kuadër të planit të rritjes.

Nga ana tjetër, duke qenë se Shqipëria do t'i nënshtrohet procesit të vlerësimit nga Komiteti MONEYVAL gjatë vitit 2025-2026, puna parapërgatitore që po ndërmerret nga të gjitha institucionet do të shërbejë për të mundësuar marrjen e një vlerësimi pozitiv.

Është me rëndësi të veçantë, që të gjitha institucionet që ju drejtoni të angazhohen me përkushtim maksimal për të përmbushur të gjitha kërkesat në mënyrë që vlerësimi i radhës së MONEYVAL për Shqipërinë të ruajë trendin pozitiv të vlerësimit që tashmë e kemi konsoliduar.

Masat për të cilat kërkohet vëmendje juaj në veçanti janë:

§  Angazhimi i stafeve me njohuri të fushës, për t’ju përgjigjur në kohë kërkesave të ekspertëve vlerësues. Në këtë kontekst, qëndrueshmëria e stafit është gjithashtu një aspekt i rëndësishëm që duhet të mbahet në konsideratë nga të gjithë drejtuesit.

§  Evidentimi me qartësi i nevojave buxhetore për ngritjen e sistemeve dhe rritjen e kapaciteteve institucionale, në mënyrë që t'i adresojmë në kohë, në koordinim edhe me partnerët ndërkombëtarë”, ka theksuar zv.kryeministrja./ CNA





Lajmet e fundit nga