Historiani Agim Musta, testamenti më aktual se kurrë: "E keqja më e madhe e këtij kombi mbetet komunizmi"

24 Korrik 2024, 10:59, Aktualitet CNA

Agim Musta

Në 5-vjetorin e vdekjes se historianit, të burgosur politik, Agim Musta, vajzat e tij Elizabeta dhe Suela Musta i kanë dedikuar një mesazh shpirtëror. Ndër të tjera ato theksojnë se amanetet e tij, bashkëvuajtësve dhe gjithë shtresës së të burgosurve dhe të persekutuarve politikë të diktaturës, mbeten ende të parealizuara. Në fakt nuk ka se si ndodh ndryshe, kur prej më se një dekade vendi drejtohet nga bijtë dhe pasardhësit e nomenklaturës komuniste të cilët kanë një përçmim të heshtur ndaj pasardhësve të të persekutuarve dhe ndaj vetë atyre që kanë mbetur gjallë.

Më poshtë mesazhi i vajzave të historianit Agim Musta i burgosur politik dhe autor i 14 botimeve mbi burgjet, kampet, internimin dhe kronikat e kalvarit 50-vjeçar të terrorit komunist.

"Sot shënohen 5 vite nga ikja jote, por për neve, njerëzit e afërt, miqtë, bashkëvuajtësit dhe shumë shqiptarë të tjerë, je çdo ditë i gjallë me mendimet, punët, librat dhe shumë artikuj historikë që ke lënë pas.

Ishe i pari që në fillim të viteve ‘90, krijove dhe publikove Hartën e kampeve dhe burgjeve të Diktaturës (që vitet e fundit shumë organizata e kanë digjitalizuar dhe nuk të kanë përmendur as idenë...)

I pari që artikulove dhe këmbëngulje me forcë në çdo konferencë dhe dalje publike, për nevojën emergjente të shoqërisë shqiptare për:

---Dekomunistizimin (mbi të gjitha si ideologji dhe mënyrë të vepruari) që nga pastrimi i komunistëve nga nivelet më të ulëta të zyrave dhe çdo institucioni e deri në rangjet më të larta të politikës dhe të gjitha pushteteve dhe hapësirave publike.

---Përfshirja në kurrikulat mësimore të historisë nëpër shkolla që nga nëntëvjeçare e më tej, të burgjeve, të kampeve të internimit dhe të punës së detyruar, si dhe të persekutimit të pashembullt të qindra mijëra shqiptarëve në diktaturën komuniste.

---Heqja e emrave të kriminelëve komunistë të luftës së dytë dhe më pas të persekutorëve të diktaturës nga rrugët e kryeqytetit dhe të qyteteve të tjera të Shqipërisë.

---Kthimi në muze dhe në monumente të kujtesës, të burgjeve famëkeqe të Spaçit, Burrelit, Qafë-Barit dhe kampeve të Tepelenës, të... Lushnjës, Vlorës etj.

Ishe ideator dhe mbrojtës i paepur i çdo nisme për kujtesën historike me merakun, sikurse përsërisje kudo dhe kurdoherë: ‘E keqja më e madhe e këtij kombi mbetet komunizmi dhe antishqiptari më i pabesë, Enver Hoxha’.

Mbetesh një patriot i madh, sepse lë pas dije dhe mesazhe që i qëndrojnë kohës dhe brezave..

Krenare për ty dhe e bindur se ne do të vazhdojmë të punojmë me mënyrën tonë, për realizimin e amaneteve të tua.

U prehsh në paqe dhe pranë Zotit,

ti dhe gjithë shqiptarët e vuajtur nga sistemi më i egër dhe ateist në botë".