Afera me inceneratorin e Fierit/ Arrestohet në Gjermani, Silvestër Driza, lidhja e tij me ish-Ministrin

22 Shkurt 2023, 09:00, Aktualitet CNA

Afera me inceneratorin e Fierit/ Arrestohet në Gjermani, Silvestër

30-vjeçari Silvestër Driza, i shpallur në kërkim nga SPAK për pastrim parash për aferën e inceneratorëve, është arrestuar në Gjermani.

Tashmë pritet ekstradimi i tij për të dhënë llogari para drejtësisë shqiptare për inceneratorin e Fierit.

Nga aktet e administruara, që ka në duar SPAK-u, del se babai i Silvester Drizës ishte i punësuar si shofer autobusi në shoqërinë e vëllait të ministrit, më pas punoi në hekurudhë dhe më pas u kthye ortak me të birin”.

Më tej aktet tregojnë se Silvester Driza, së bashku me Agim Seferin, që ishte njohje personale e ish-ministrit Lefter Koka, nga llogaria e tyre kanë kryer pagesën e qirasë së Kokës.

Njoftimi i Policisë:

Vijon shkëmbimi i informacioneve mes Interpol Tiranës dhe homologëve, për lokalizimin, kapjen dhe ekstradimin e shtetasve në kërkim ndërkombëtar.

Si rezultat i informacioneve të siguruara dhe shkëmbimit të tyre me homologët gjermanë, u finalizua operacioni policor i koduar “Freiburg”.

Në kuadër të këtij operacioni, është kapur nga autoritetet policore të Gjermanisë dhe është arrestuar përkohësisht, me qëllim ekstradimi, një shtetas i akuzuar për pastrim të produkteve të veprës penale ose të veprimtarisë kriminale.

Në vijim të bashkëpunimit mes Interpol Tiranës dhe homologëve, për lokalizimin, kapjen dhe ekstradimin e shtetasve të kërkuar nga SPAK-u, në kuadër të operacionit policor të koduar “Freiburg”, si rezultat i informacioneve të siguruara dhe shkëmbimit në kohë, nga Policia gjermane është kapur në Freiburg, Gjermani, dhe është arrestuar me qëllim ekstradimi drejt Shqipërisë, shtetasi i shpallur në kërkim ndërkombëtar Silvestër Driza, 30 vjeç.

Gjykata e Posaçme kundër Korrupsionit dhe Krimit të Organizuar, Tiranë, i ka caktuar këtij shtetasi masën e sigurisë “Arrest në burg”, për veprën penale “Pastrimi i produkteve të veprës penale ose të veprimtarisë kriminale”.

Interpol Tirana, në bashkëpunim me Interpol Wiesbaden/Gjermani, vijon procedurat për ekstradimin e këtij shtetasi, drejt vendit tonë.