Zyrtarizohen emrat/ Këta janë kandidatët që do garojnë në zgjedhjet e 6 marsit

3 Shkurt 2022, 21:08, Politikë CNA

Zgjedhjet e pjesshme vendore po afrojnë dhe kandidatët tashmë janë zyrtarisht gati.

Në gjashtë bashkitë e vendit, atë të Durrësit, Shkodrës, Lushnjes, Rrogozhinës, Dibrës dhe Vorës, do të ketë një betejë mes tre kandidatëve, atyre të Partisë Socialiste, të Lulzim Bashës dhe Sali Berishës që dolën nga primaret.

Bashkia e Durrësit, është qeverisur prej shumë vitesh nga socialistët. Në këto zgjedhje, kryeministri Edi Rama ka vendosur të kandidojë kryetaren e komanduar Emirjona Sako, e cila përballë do të ketë Ardian Mukën, një inxhinier urbanist i dalë nga baza demokrate dhe Luan Hotin që e ka propozuar dhe miratuar Lulzim Basha. Qyteti bregdetar vijon të jetë pa kryetar pas dorëheqjes që dha Valbona Sako, e cila pas tërmetit të 26 nëntorit 2019 u shpreh se ishte e kënaqur me 53 viktima.

Socialistët gjithashtu kanë vendosur të garojnë në Shkodër me një tjetër grua, Majlinda Angonin, aktualisht prefekte të qarkut Shkodër, e cila përballë do të ketë ish deputetin demokrat Bardh Spahia nga koalicioni Shtëpia e Lirisë dhe Xhemal Bushatin nga Basha. Bashkia Shkodër është e vetmja që vijon të drejtohet nga demokratët, duke mbetur në detyrë Voltana Ademi, pas largimit të Valdrin Pjetrit, të cilin e dogji dekriminalizimi.

Për Bashkinë Dibër, PS garon me Rrahim Spahiun, Lulzim Basha me Luan Hakën, ndërsa kandidati i Berishës do jetë Premtim Kryemadhi. ?Ju premtoj demokratëve që nuk do të zhgënjehen me kandidaturën time. Ne do të bëjmë një punë të shkëlqyer që nga zgjedhja e stafit, i cili sot është për të ardhur keq. Të gjithë demokratët duhet të bëhen bashkë kundër këtij regjimi?, tha Kryemadhi pas zgjedhjes nga baza.

Në Rrogozhinë, socialistët do të shkojnë në këtë betejë me Edison Memollën, aktualisht kryetar i komanduar. Lulzim Basha ka vendosur që të kandidojë Ferdinand Saraçin, ndërsa nga primaret u zgjodh Hekuran Xhani.

Për Bashkinë e Vorës, PS kandidon arsimtarin Blerim Shera.

Demokratët e Vorës zgjodhën Lulzim Vranën si kandidatin e tyre për kryetar Bashkie, ndërsa Lulzim Basha zgjodhi Ymer Markun.

Pas arrestimit të Fatos Tushes për korrupsion, pa kryetar është edhe Bashkia e Lushnjes. PS vendosi të kandidojë për këtë post, kryetaren e komanduar Eriselda Sefa, e cila sipas socialistëve mori mbështetjen më të madhe nga strukturat dhe pëlqimin më të lartë në sondazhet e kryera.

Ndërsa Elton Bano ishte emri që mori më shumë vota nga baza demokrate për të vijuar betejën në 6 mars, ku përballë përveç kandidates së PS do të ketë edhe kandidatin e Lulzim Bashës, Indrit Sefën.

Kandidatët për kryetar bashkie më 6 mars
Kandidatët e PS:

Bashkia Shkodër, Majlinda Angoni

Bashkia Durrës, Ermirjana Sako

Bashkia Dibër, Rahim Spahiu

Bashkia Vorë, Blerim Sheraj

Bashkia Rrogozhinë, Edison Memolla

Bashkia Lushnjë, Eriselda Sefa

Kandidatët e Lulzim Bashës:

Bashkia Shkodër, Xhemal Bushati

Bashkia Durrës, Luan Hoti

Bashkia Lushnjë, Indrit Sefa

Bashkia Dibër, Luan Haka