Dalin detaje të reja/ Si u manipulua nga policia ngjarja e Moravës

25 Gusht 2021, 19:10, Aktualitet CNA

Fatal.al ka nxjerrë detaje të reja nga ngjarja e ndodhur në Moravë të Korçës. Sipas deklaratës së shtetasit A.R dhe falë videos së siguruar nga biznesi në Moravë, zbulohet se familja Misha e ka nisur sulmin e para, rrugës duke shkuar në Malin e Moravës.

Fatal.al bën të ditur se shtetasi A.R ka qenë duke ecur me makinë drejt biznesit të tij, kur është sulmuar nga familja Misha. Arsyeja e fillimit të sherrit, mësohet të jetë banale. Gjithçka ka nisur për shkak të një borie makine, të cilës shtetasi A.R i ka rënë për të liruar rrugën.

Por familjarët Misha, për këtë shkak banal, kanë bllokuar rrugën duke dalë nga makina dhe duke kërcënuar shtetasin A.R. Fatal.al bën të ditur se ata kanë goditur makinën e këtij shtetatasi si edhe kanë tentuar t?i hapin derën e makinës për ta goditur.

A.R për të shmangur këtë përplasje të nisur për arsye banale, është larguar duke u ngjitur drejt biznesit të tij. Shtesasi A.R ka deklaruar se është larguar menjëherë, pasi është kërcënuar.

Sapo ka mbërritur në biznesin e tij, përsëri familja Misha nuk e ka lënë të qetë. Ata janë afruar drejt biznesit të tij dhe e kanë kërcënuar me armë. Këto pamje i paraqet edhe videoja më poshtë. Shtetasi A.R mbahet me forcë nga Sotiraq Misha, teksa i biri Nesti Misha, i vendos armën në kokë për ta qëlluar.

Ndërkohë A.R ka deklaruar se është qëlluar në kokë me tytën e armës dhe vazhdimisht me grushta nga Sotiraq Misha dhe i biri. Sipas videos tjetër të filmuar më poshtë duket qartë se A.R ka tentuar të lirohet dhe sapo është liruar, ky i fundit është drejtuar drejt biznesit të tij.

Sikurse duket edhe nga videoja, shtetasi A.R, në asnjë moment nuk ka pasur një armë të ftohtë me vete. Këtë e kanë vërtetuar edhe klientët e biznesit, të cilët kanë qenë prezentë dhe e kanë parë të gjithë skenën.

Klientët janë shprehur se një nga autorët e kësaj ngjarjeje kriminale, xhaxhi i Nesti Mishës, ka pasur në dorë një thikë, më të cilën ka tentuar të godasë shtetasin A.R, por padashje ka qëlluar të vëllain e tij, Sotiraq Mishën.

Në krahun tjetër, policia, vazhdon ta inkriminojë skenën, duke mos marrë dëshmitë e tyre dhe duke i larguar me forcë.

Nga fatal.al dhe investigimet e kryera dyshohet se banda policore bashkëpunon me familjen Misha në shpërndarjen e drogës dhe transportin e emigrantëve të paligjshëm.

Policia nuk ka bërë asnjë hetim mbi këtë ngjarje, asnjë kontroll të banesës dhe biznesit të familjes Misha. Sipas të dhënave nga fatal.al, policia po strehon Sotiraq Mishën dhe Nesti Mishën në spitale për t?iu shmangur drejtësisë./CNA.al