Kush po i ndez zjarret në Shqipëri, Vetvendosje, Luli apo…?

13 Gusht 2021, 12:29, Aktualitet CNA

Një betejë prej gati një muaj po kthehet në një makth jo vetëm për shtetin, por edhe për qytetarët kudo në Shqipëri.

Flakët po përpijnë me qindra e mijëra hektarë pyje, shkurre, ferra në zona të ndryshme të vendit. Sapo fiket një zjarr në Vlorë, shpërthen një tjetër në Kalimash e sa fiket Kalimashi ndizet në Korçë.

Sa fiket Korça ndizet Berati, më pas Kolonja, Gjirokastra dhe flakët shkojnë më tej në Fier, ku janë djegur edhe mbetjet urbane e kështu me radhë.

Po kush i ndez zjarret? Ka disa dyshime dhe teori.

Megjithëse, Ministri i Mbrojtjes Niko Peleshi dhe Drejtori i Përgjithshëm i Emergjencave Civile Haki Çako, tashmë kanë filluar të artikulojnë qartazi fjalinë , zjarret janë të qëllimshme.

Dyshohet për shumë pista. Pista politike dhe jo, por le ti marrim me radhë.

Pista Vetvendosje

Kjo është një nga pistat ku dyshohet, se elementë të kësaj force politike në zona të ndryshme, mbështetës, të ndezin zjarre me qëllim. Kjo pas debateve për Bregoviçin me investimin e vetë të kryeministrit të Kosovës, Albin Kurti në përplasje direkte me kryeministrin Edi Rama.

Zjarri në Kalimash, gatishmëria e Kosovës, ndërhyrja e Vetvendosjes, ndërkohë që diskutohej ftesa e bërë ndaj këngëtarit serb Goran Bregoviç, janë disa nga hijet e dyshimit apo teoritë konspirative që drejtojnë gishtin tek “Vetvendosje” e Albin Kurtit.

Opozita dhe Lulzim Basha

Socialistët nuk reshtin së akuzuri Opozitën edhe për dështimet e tyre, që në rastin e zjarreve, patjetër do të ishte një kthim përgjigjeje.

Në vitin 2010 dhe 2011, kur zjarret u ndezën në Shqipëri, në atë kohë ishte kryeministër Sali Berisha u akuzua Opozita, elementë dhe struktura ta saj.

Disa persona të arrestuar për zjarrvënie atëherë kishin lidhje me socialistët, megjithëse ishin thjesht punëtorë apo banorë të fshatrave periferikë.

Tani, mesa duket Qeveria po bën të njëjtën gjë, po kthen sytë nga Opozita, i quan zjarre të qëllimshme dhe pa akuzë nuk le edhe Lulzim Bashën.

Ende nuk ka elementë të PD nga personat e arrestuar që të kenë lidhje direkte, por Qeveria po bën të njëjtën lojë siç bënte ajo e mëhershmja.

Vetë Rama

A mund të ndodh që vetë kryeministri, struktura të PS të pakënaqur apo bizneset të cilat kërkojnë të investojnë në zona të ndryshme të vendosin zjarrin?

Kështu ndodhi me Karaburunin, për të cilin pati edhe një reagim publik.

Mund të jenë biznesmenë afër kryeministrit, të cilët urdhërojnë djegien në disa zona dhe më pas nëpërmjet hallkave të tjera, flaka ndizet edhe diku tjetër për të humbur gjurmët.

Nuk është e rastësishme. Po, përtej pyjeve zjarri ra edhe në Fier, në landfill tek mbetjet. Një zjarr tjetër ndodhi në Krujë, ndërkohë që këto pika kanë lidhje direkte me investime të Qeverisë apo të pushtetit vendor, me paratë që qarkullojnë nga taksa paguesit.

Pra ka një lidhje direkte me Qeverinë dhe kryeministrin Rama.

Së fundmi, piromanët

Kjo është teoria më e besueshme deri më tani, se ka njerëz që e vendosin për shumë arsye, zjarrin në pyje.

Së pari janë ata që i vendosin për kullotat, për të liruar rrugët për bagëtitë e tyre. Më tej vijnë ata që i djegin nga inati, toka të cilat nuk i marrin dot t?i përdorim, toka të të afërmëve që nuk u janë kthyer si pronë, pyje të cilat kërkojnë t?i kthejnë si zona për të futur bagëtitë, apo njerëz që mund ta vendosin zjarrin nga inati, njerëz nga ata që kanë qejf flakën dhe që quhen piromanë apo edhe militantë të çmendur politikë që edhe pa urdhër nga partia shkojnë dhe vendosin zjarrin.

Gjithashtu nuk përjashtohen zjarret nga pakujdesia dhe temperaturat e larta. Por këto janë më të pabesueshmet, sepse në disa zona malore, ku ka rënë zjarri vendet janë me temperatura shumë të ulta.

Janë male dhe kullota të cilat nuk janë prekur nga temperatura të larta që mund të provokonin zjarr. Pa dorën e njeriut me qëllim apo nga pakujdesia zjarre nuk mund të ketë në të tilla territore.

Këto janë të gjitha teoritë dhe dyshimet në lidhje me zjarret, që kanë shkretuar me mijëra hektarë pyje në Shqipëri nga Veriu në Jug dhe nga Lindja në Perëndim, duke nxjerrë shumë pikëpyetje dhe jo pa fakte.

Ka persona të arrestuar, persona të dyshuar, persona të shpallur në kërkim dhe qytetarët që bërtasin se duhet të ketë një ligj shumë të ashpër për këtë fenomen që vit pas viti po kthehet mjaft shqetësues për shtetin dhe për ta./CNA.al