E fundit!

21:26 Politikë

Balla reagon ndaj Athinës: Narta është tokë shqiptare, autoktone

Kryetari i Grupit Parlamentar të Partisë Socialiste dhe Dr...

Zjarret dëme kolosale në Vlorë e Karaburun/ Prefekti: Zjarrfikësve u mungojnë pajisjet elementare

12 Gusht 2021, 18:17, Aktualitet CNA

Prefekti i Qarkut Vlorë, Flamur Mamaj thotë se vatrat e zjarrit kanë shkaktuar një dëm kolosal në Vlorë dhe sidomos në Karaburun.

Edhe pse nuk ka ende një bilanc për dëmin, z. Mamaj tha se vetëm në Gadishullin e Karaburunit dëmi i ka kaluar dëmin e vitit 2020 ku nga 128 vatra zjarri pati një dëm prej 33 milionë lekë.

Ai tha se ka pasur vatra në të 7 bashkitë e Qarkut Vlorë dhe në shumicën e rasteve kanë qenë zjarre të qëllimshme. Ndaj ai bën thirrje që të rritet dënimi për zjarrvënësit, duke e krahasuar zjarr vënien e qëllimshëm me akt terrorist.

?Zjarrfikëset nuk janë të kompletuara ashtu siç duhet nga organet e qeverisjes vendore. Mungojnë pajisjet si veshjet kundër zjarrit, pompat. Fondi nga bashkitë që qeveria i delegon duhen shfrytëzuar që zjarrfikëset të jenë në lartësinë e duhur?, tha z. Mamaj.

1.2 miliardë lekë është fondi që qeveria qendrore u ka dedikuar 61 bashkive për mbrojtjen nga zjarri në formën e transfertave të pakushtëzuara. Vlora ka një fond prej 35.3 milionë lekë.

Pavarësisht se të dhënat zyrtare tregojnë se që nga viti 1998 deri në vitin 2019 buxheti i shtetit ka investuar për mirëmbajtjen dhe shtimin e fondit pyjor mesatarisht 1 milionë euro në vit, nga 2015 janë zhdukur 1000 hektarë pyje.

Flakët e 3 javëve të fundit, e rendojnë më tej këtë situate ndërsa eksperti i mjedisit, Mihallaq Qirjo thotë se duhen të paktën 50 vite për të rikuperuar pyjet e djegur.

Për vitin e ardhshëm qeveria do të japë 1,6 miliardë lekë, rreth 500 milionë më shumë se këtë vit, por ky fond përdoret vetëm në rastet e shpalljes së fatkeqësive natyrore.

Ekspertët thonë se për të ruajtur mjedisin dhe biodiveristetin sot duhen strategji afatgjata, pasi risku i katastrofave do të jetë më i madh dhe Shqipëria ka ekspozim të lartë.

Një studim i Qendrës Rajonale të Mjedisit tregon se politizimi i shërbimit pyjor, ka krijuar një administratë jo profesionale për të menaxhuar këtë pasuri natyrore./Euronews