Jordan Daci jep alarmin/ Shqipëria është në rrezik nga ngjarjet kriminale, duhen masa urgjente

28 Qershor 2021, 14:41, Aktualitet CNA

Masakra e Velipojës ku humbën jetën katër persona dhe dy të tjerë mbetën të plagosur tronditën mbarë opinion publik.

I shokuar nga kjo ngjarje ishte edhe juristi Jordan Daci, i cili shprehte se këto fenomene janë si pasojë e gjendjes së vështirë që po përjeton vendi, duke nisur nga ato sociale, politike dhe ekonomike.

Në një intervistë për CNA.al, Daci deklaroi se shteti është duke ndjekur një politikë të gabuar, duke kontribuuar sipas tij në thellimin e konflikteve dhe se plani për arsimin, që është baza për edukimin e brezave, është lënë në harresë prej 30 vitesh.

?Është një ngjarje tepër e rëndë që tregon gjendjen e vështire sociale, politike dhe ekonomike në të cilën ndodhet vendi. Tregon që jeta në Shqipëri është e rrezikuar dhe që shoqëria jonë ndodhet në një krizë të thellë, krizë e cila në vend që të zbutet apo zhbëhet me ndërhyrjen e shtetit, ky i fundit me politikat e tij të gabuara, po kontribuon me thellimin e saj.

Kemi një urgjencë kombëtare, për një plan kombëtar për të adresuar çështjen e konflikteve në shoqëri dhe posaçërisht për të ulur dhunën. Ky plan duhet të ketë si bazë arsimin që ka 30 vjet që është harruar dhe vetëm shkatërrohet çdo ditë, rritjen e mirëqenies ekonomike dhe zbatimin rigoroz të ligjit?, tha Daci për CNA.al.

Juristi më tej shtoi se duhet një ndryshim thelbësor për rendin dhe sigurinë në vend, që sipas tij kërkon dy plane veprimesh.

Ai tha për CNA.al se duhet të forcohen kapacitetet e policisë si dhe tu ofrohet atyre një mbështetje financiare.

?Kjo kërkon dy plane veprimesh. Një plan afatshkurtër që duhet të shoqërohet me mobilizim të forcave të rendit për të kryer aksione dhe goditur në kohë çdo fenomen kriminal dhe për të dekurajuar krijimin dhe ekzistencën e “të fortëve” të paprekshëm.

Duhet të forcohen kapacitetet e policisë dhe duhet të ofrohet mbështetje dhe trajtim financiar dhe trajnues më i madh duke përfshirë rritjen e numrit dhe futjen e teknologjisë në shërbim të policisë. Shteti me ndërhyrjet e tij në legjislacion duhet të parandalojë konfliktet dhe jo t’i shkaktojë sikurse ka vepruar me legjislacionin e zbatueshëm për lejet e plazheve. Plazhi, deti dhe pasuritë natyrore janë të Shqiptarëve dhe jo të banditëve apo të fortëve që i zënë ato me forcë apo i marrin me korrupsion. Duke i rikthyer tek qytetarët me dorë të hekurt, duke shporrur çdo pushtues menjëherë, parandalohen thuajse të gjithë konfliktet e ngjashme. Plani afatshkurtër duhet të përfshirë edhe një seri masash të tjera.

Në planin afatgjatë duhet bërë një studim në nivel kombëtar me ekspertë të shumë fushave dhe të hartohet një strategji kombëtare për këtë qëllim e shoqëruar me një plan veprimi konkret. Plani duhet të jetë për një periudhë 10 vjeçare kur 5 vitet e para duhet të jenë me një intensitet tepër të lartë punë. Baza e këtij plani duhet të jetë rritja e cilësisë dhe shtrirjes së arsimit në çdo cep të vendit dhe hartimi dhe zbatimi i shumë programeve sociale, ekonomike që synojnë zbutjen ose zhdukjen e faktorëve kriminogjenë ose faktorëve që çojnë në rritjen e kriminalitetit në vend. Ligjet duhet të hartohen me kujdes të madh dhe të rishikohen të gjithë ligjet që janë bërë shkak për konflikte në shoqëri. Shumë konflikte mund të zgjidhen nëpërmjet rishikimit të legjislacionit ose nëpërmjet zgjidhjeve që duhet të bëjë qeveria apo Kuvendi etj?, u shpreh Daci./CNA.al