Gazetari i arrestuar bjellorus/ "Po bashkëpunoj me autoritetet"

24 Maj 2021, 21:20, Kosova & Bota CNA

Gazetari i arrestuar bjellorus, Raman Protasevich, përmes një videoje tha se po bashkëpunon me autoritetet. “Mund të them se nuk kam probleme shëndetësore. Unë vazhdoj të bashkëpunoj me hetuesit dhe po merrem në pyetje në lidhje me organizimin protestave masive në qytetin e Minsk”, tha ai. Autoritetet e Minskut hodhën poshtë “thashethemet” në mediat sociale se Protasevich ishte shtruar në spital dhe thanë se nuk kishin asnjë informacion në lidhje me ndonjë problem shëndetësor të gazetarit.

Pratasevich ka qenë administrator i kanalit NEXTA Live në Telegram, platformë që ka mbuluar protestat që kanë shpërthyer në Bjellorusi prej mbajtjes së zgjedhjeve. Autoritetet bjelloruse kanë nisur hetimet ndaj Pratasevich dhe kolegut të tij Stsyapan Putsila, në muajin nëntor, nën dyshimet për organizim të çrregullimit masiv, prishjes së rendit shoqëror dhe nxitjes së urrejtjes.

Në tetor të vitit të kaluar, një gjykatë në Minsk e ka shpallur kanalin NEXTA dhe logon e tij si ekstremiste.

Si ndodhi arrestimi i tij?

Autoritetet bjelloruse kanë aktivizuar një aeroplan ushtarak për të përcjellë aeroplanin civil, i cili ka qenë në rrugë në Vilnius nga Athina më 23 maj, për atë që në fund doli të ketë qenë alarm i rremë për bombë. Kur aeroplani është ulur, policia ka ndaluar Raman Pratasevich, 26-vjeç, aktivist opozitar dhe gazetar, i cili përballet me akuza në Bjellorusi, për të cilat mund të mbetet 15 vjet në burg.

Reagimet ndërkombëtare

Vendet perëndimore kanë shprehur zemërim ndaj Bjellorusisë duke e quajtur ?pirateri? devijimin dhe detyrimin e aeroplanit që të aterrojë në Bjellorusi. Udhëheqësit e Bashkimit Evropian po mbajnë një samit emergjent në Bruksel për shkak të përdorimit të Bjellorusisë të një avion luftarak MiG-29 për të devijuar një aeroplan civil. Kërkesat për vendosje të sanksioneve ndaj Bjellorusisë janë shtuar.

Radio Evropa e Lirë ka parë një dokument nga samiti i BE-së në të cilin u bëhej thirrje të gjithë transportuesve ajrorë me bazë në BE të shmangin fluturimet mbi Bjellorusinë dhe të bien dakord për të ndaluar linjat ajrore bjelloruse nga hapësira ajrore dhe aeroportet e BE-së.

Ndërkohë, Sekretari i Përgjithshëm i Kombeve të Bashkuara, Antonio Guterres, më 24 maj mbështeti thirrjet për një hetim të pavarur të incidentit. Në reagimin e Ministrisë së Jashtme të Kosovës (MPJ), thuhet se pa miratimin e presidentit rus, Vladimir Putin nuk do të ndodhte sulmi i Bjellorusisë ndaj aeroplanit.

?NATO, SHBA, BE duhet të marrin masa për të mbrojtur dhe ruajtur aleatët?, thuhet në reagimin e MPJ-së.

Çfarë po ndodhë në Bjellorusi?

Bjellorusia është tronditur nga protestat që kur Alyaksandr Lukashenka – në pushtet që nga viti 1994 – u shpall fituesi i zgjedhjeve presidenciale në gusht të vitit 2020. Perëndimi dhe opozita i konsiderojnë zgjedhjet e manipuluara.

Opozita thotë se Svyatlana Tsikhanouskaya, e cila u arratis në Lituaninë fqinje pas zgjedhjeve për shkak të shqetësimeve në lidhje me sigurinë e saj, ishte fituesja e vërtetë e votave.

BE-ja ka vendosur tashmë tre raunde sanksionesh kundër Bjellorusisë dhe ishte duke përgatitur një raund të katërt. REL