Seria e skandaleve me dëm ekonomik/ Dështimi i Avokates së Shtetit dhe fatura që duhet të paguajmë

7 Prill 2021, 17:47, Politikë CNA

Shqipëria humbi përfundimisht gjyqin me sipërmarrësin Italian Francesco Beçhetti lidhur me dëmshpërblimin e kërkuar nga ai për mbylljen e televizionit ?Agon? në vitin 2015.

Qendra Ndërkombëtare për Zgjidhjen e Mosmarrëveshjeve të Investimeve (ICSID) një gjykatë arbitrazhi e dënoi Shqipërinë me 110 milionë euro, duke gjykuar se mbyllja e televizionit ishte motivuar politikisht. Një faturë e cila do të duhet ta paguajën taksapaguesit shqiptarë.

Por çfarë bën avokatura e shtetit?!

Prej 30 vitesh përsërit e njëjta histori. Kompani të huaja vijnë të investojnë në Shqipëri, por pa filluar mirë punë, kontrata prishet në mënyrë të njëanshme nga shteti ynë.

Më pas, kompanitë të cilat nuk kanë investuar asnjë euro në Shqipëri, vetëm me një projekt në letër, i drejtohen gjykatës ndërkombëtare duke kërkuar qindra miliona euro dëmshpërblim.

Vëtën në pak muaj Shqipërisë i janë faturuar mbi 150 milionë euro, nga gjykatat ndërkombëtare e arbitrazhit: 110 milionë euro të Bechettit, dhe 44 milionë dollarë të kompanive Copri dhe Aktor, që u kontraktuan në vitin 2012 nga Ministria e Infrastrukturës dhe Energjisë, për ndërtimin e autostradës Tiranë-Elbasan.

Por pse hesht avokatura e shtetit! Pse hesht Enkelejda Muçaj e cila paguhet nga taksat tona!

Nuk do ishte normale që të kishtë dhënë dorëheqjen minimalisht sepse ka dështuar qoftë në zgjedhjen e kompanisë që i ka përfaqësuar (Foley Hoag), qoftë strategjinë që ka ndjekur.

Janë shumë çështje që Shqipëria humb, fatura financiare qindramilionëshe, por ende nuk ka asnjë person që të përgjigjet për këtë dëm të madh ekonomik.

Kujtojmë këtu dhe 16.8 milionë eurot nga pallati i Lulzim Bashës, ku përfituesi kryesor ishte vjehrri i tij Xhaferr Isuf, dënuar nga gjykata e Strazburgut.

Beçhetti e fitoi gjyqin dhe u trajtua çështja politike, por nga avokatura e shtetit askush nuk përgjigjet sot.

Cfarë bën avokatura e shtetit, flen gjumë!?

Shteti shqiptar ka humbur me miliona euro por këta miliona euro nuk i paguajnë nga xhepi tyre as avokati i shtetit, as Edi Rama, as Lulzim Basha, as Ilir Meta! I paguajnë shqiptarët nga taksat e tyre.

Si ka mundësi që Avokati i Popullit të mos ketë asnjë prononcim, pavarësisht se dëmi është jo vetëm i konsiderueshëm por edhe përgjegjësi direkte e institucionit?

Si ka mundësi që nuk është njoftuar institucioni i Presidencës, sidomos për situata dhe skandale kaq madhore si rasti konkret?

Si ka mundësi që ky institucion do të mbahet mend vetëm për serinë dhe serialet e skandaleve me dëm ekonominë e vendit dhe buxhetin e shtetit, që edhe pa këto skandale, është tejet i lodhur dhe i telendisur?

Si ka mundësi që performanca e një pozicioni kaq kyç, në skandale dhe dëme kaq të mëdha, nuk jep asnjë indicie për një deklaratë të mirëfilltë publike, qoftë edhe për të justifikuar veten?

Si ka mundësi që nesër, në një pozicion të ri, publik apo privat, një titullar i tillë do ta vërë në CV-në e vet një buqetë të tillë skandalesh që bien totalisht dhe katërcipërisht ndesh me misionin dhe benefitet nga taksapaguesit shqiptarë?

Si ka mundësi që titullarja akoma sot e kësaj dite nuk gjen kurajën personale dhe profesionale, apo qoftë edhe atë partiake, për të dhënë dorëheqjen?/CNA.al