Prokurori ankohet në KLP/ Olsian Çela na detyron me udhëzime të pabazuara në ligj

22 Mars 2021, 13:49, Aktualitet CNA

Prokurori i Vlorës, Albert Kuliçi është ankuar në Këshillin e Lartë të Prokurorisë, për Prokurorin e Përgjithshëm Olsian Çela.

Shkak për këtë ankesë është bërë një Udhëzim i Përgjithshëm i nxjerrë nga Çela, që sipas prokurorit Kuliçi, është në kundërshtim flagrant me ligjin dhe ka dalë nga një organ, i cili nuk e ka këtë kompetencë. Kuliçi ka kërkuar nga KLP, konstatimin e pavlefshmërisë absolute të Udhëzimit të Përgjithshëm Nr.I6, datë 14.12.2020 “Per disa ndryshime në Udhëzimin e Përgjithshëm Nr.I2, datë 20.07.2020 “Mbi rregullimin e marrëdhënieve mes prokurorëve dhe drejtuesve të prokurorisë, informimin, transparencën dhe garantimin e pavarësisë, në prokuroritë me juridiksion të përgjithshëm”, të Prokurorit të Përglithshëm.

Gjithashtu ai ka kërkuar konstatimin e pavlefshmërisë absolute të Udhëzimit të Përgjithshëm Nr.I 2, datë 20.07.2020 “Mbi rregullimin e marrëdhënieve mes prokurorëve dhe drejtuesve të prokurorisë, informimin, transparencën dhe garantimin e pavarësisë, në prokuroritë me juridiksion të përglithshëm”, të ndryshuar, të Prokurorit të Përgjithshëm.
Sipas Kuliçit, përmes këtij udhëzimi, i cili është i detyrueshëm për zbatim, Prokurori i Përgjithshëm, Olsian Çela e ka bërë të detyrueshme për zbatim, edhe udhëzimet që nuk janë të tilla (të detyrueshme), duke marrë kompetencën e drejtuesit të prokurorisë në ushtrimin e ndjekjes penale, si dhe duke parashikuar rregulla të reja proceduralë.

Kuliçi këmbëngul, se Prokurori i Përgjithshëm, ka marrë kompetencat e drejtuesit të prokurorisë, duke normuar me një udhëzim të përgjithshëm, detyrueshmërinë e ushtrimit të kompetencave të drejtuesit të prokurorisë në drejtimin administrativ të prokurorisë, e për rrjedhojë në detyrimin e të gjithë prokurorëve që të zbatojnë këtë udhëzim, për vetë faktin se ligji ka sanksionuar, se udhëzimet e përgjithshme janë të detyrueshme.

Sipas të njëjtit, Prokurori i Përgjithshëm edhe pse gëzon kompetencën për të nxjerrë udhëzime të përgjithshme, kjo kompetencë nuk mund të shtrihet në çdo fushë që lidhet me organizimin dhe funksionimin e prokurorisë.

Një ankesë e tillë është bërë dy herë radhazi në KLP. Kjo e fundit ka vendosur të rrëzojë ankimimin e prokurorit Albert Kuliçi me 10 vota pro, si të pabazuar në ligj, duke dalë në krah të Prokurorit të Përgjithshëm, Olsian Çela.

I vetmi anëtar i KLP që ka dalë kundër Prokurorit të Përgjithshëm, është Tartar Bazaj./CNA.al