Studimi/ Ja si gjenet përcaktojnë shijet tona ndaj ushqimeve

27 Shkurt 2021, 12:55, Blog CNA

Një studim i botuar në ?Nature Human Behavior?, i kryer nga Universiteti i Osaka dhe Riken Center, ka shqyrtuar lidhjen midis gjeneve dhe ushqimit. Sipas asaj që zbuloi ekipi hulumtues, disa variante gjenetike jo vetëm që ndikojnë direkt në shijet tona ndaj ushqimeve të caktuara, por ato do të shoqërohen gjithashtu edhe me fillimin e disa sëmundjeve që lidhen pak a shumë drejtpërdrejt me ushqimin, siç janë diabeti dhe kanceri. ?Është e vërtetë që ne jemi ajo që hamë. Por tani mund të themi gjithashtu se hamë atë çka jemi?- thotë Jukinori Okada, një nga autorët e studimit.

Më shumë qumësht, më pak alkool

Studimi analizoi zakonet e të ngrënit të mbi 160.000 japonezëve, duke studiuar gjenet e pjesëmarrësve, duke nisur nga shijet e tyre ushqimore. Ekspertët morën në konsideratë në mënyrë specifike 13 zakone të ngrënies, përfshirë konsumimin e alkoolit, kafesë, çajit jeshil, qumështit, kosit, djathit, tofut, peshkut, perimeve, mishit dhe nato, një ushqim tipik japonez i prodhuar nga soja e thartuar.

U zbuluan 10 lidhje të reja midis dietës dhe gjenomit, 4 prej të cilave kishin të bënin me konsumin e kafesë dhe 3 me konsumin e alkoolit. Studiuesit zbuluan në veçanti, se një variacion i veçantë i gjenit (Polimorfizmi i Vetëm Nukleotid), SNP) i lidhur me konsumimin e kafesë ose alkoolit, ishte i lidhur me gati të gjitha zakonet e të ngrënit të marra në konsideratë.

?Kjo SNP shoqërohej me një konsum më të ulët të alkoolit, natos, tofut dhe peshkut, dhe me një konsum më të madh të çajit, qumështit dhe kosit?– shpjegon Okada. Për të përcaktuar nëse ndonjë nga SNP-të e shoqëruara me dietën ushqimore, lidhej gjithashtu me ndonjë sëmundje gjenetike, studiuesit realizuan studimet mbi lidhjen gjenomike, duke analizuar variantet gjenetike të gjenomës së pjesëmarrësve.

Ata synonin të kuptonin, nëse ato janë të lidhura me disa tipare specifike (në këtë rast, një sëmundje). Rezultatet treguan se 6 nga SNP kishin lidhje me fenotipin (pra tiparin) e të paktën një sëmundjeje, duke përfshirë disa forma të kancerit dhe diabetit të Tipit 2. Pra, gjenet duket se të ndikojnë jo vetëm në shijen tonë ndaj ushqimeve, por edhe në predispozicionin tonë për të zhvilluar lloje të caktuara të sëmundjeve gjenetike.

Parandalimi ushqimor

Sipas Okadas, këto rezultate mund të ndihmojnë në ndërtimin e një shoqërie më të shëndetshme. Duke ditur preferencat tona gjenetike për ushqime të caktuara (veçanërisht alkoolin), do të jetë e mundur që të identifikohen ata që tentojnë të abuzojnë më to, duke parandaluar kësisoj dëmtimin e shëndetit./Përshtatur nga CNA.al

Burimi: https://www.focus.it/scienza/salute/geni-gusti-malattie-alimentazione