web counter
LEXO PA REKLAMA!

SHKARKO APP

App Store
Google Play

Si koordinohet regjimi 41-bis me vizitat kolektive në spital?

1 Shkurt 2021, 15:08, Aktualitet CNA

Që prej gati një viti, Ministria e Drejtësisë, ministrja vetë, zyrtarë të tjerë të burgjeve, zyrtarë të huaj, reklamuan vënien në funksion të regjimit 41-bis për të dënuarit me rrezikshmëri të lartë shoqërore.

Fushata pati më shumë për qëllim reklamën qeveritare sesa synonte informimin e publikut.

Nëse qëllimi do ishte informimi i publikut, atëherë ministrja do të duhet të shkruante të dhëna për kategoritë e veprave penale për të cilat zbatohej regjimi i sigurisë së lartë, numrin e të dënuarve të vendosur nën regjimin e ri dhe më shumë se këto, emrat e të dënuarve vip të transferuar nën regjimin e ri të izolimit të lartë.

Pas reklamës, vijoi heshtja. Asnjë e dhënë deri kur të gjithë njoftohen për lëvizje të disa prej të dënuarve me rrezikshmëri të lartë. Kjo gjendje deri përpara 4 ditësh.

Deri kur të gjithë u njoftuam që Dritan Dajti po i nënshtrohej regjimit spitalor.

Sot lajmi del që edhe Emiljano Shullazi është dërguar drejt të njëjtit regjim. As Ministria, as Drejtoria e Përgjithshme e Burgjeve nuk shpjegon diagnozën që detyroi strukturat ku shlyhet dënimi, që të trasferojnë me rradhë Dajtin e pastaj Shullazin nga regjimi 41-bis drejt regjimit spitalor.

Duket që njoftimet lënë në dorë të gjithkujt të besojë se sëmurja e Dajtit e pastaj Shullazit ka lidhje me virusin pandemik. Por kjo nuk thuhet.

Gjetja e diagnozës i lihet fantazisë së gjithkujt. Edhe kësaj rradhe qëllimi nuk është informimi i publikut. Askush sot nuk di motivin e transferimit njëri pas tjetrit të dy prej titullarëve të krimit të organizuar.

Sa kohë titullarët e ministrisë nuk sqarojnë, gjithkush mbetet i lirë të zhvillojë fantazinë.

Si gjëja e vetme që nuk i nënshtrohet dot asnjë regjimi./CNA.al





Lajmet e fundit nga