Ja pse mirësia ndaj të tjerëve, i zgjat jetën njeriut

1 Janar 2021, 13:00, Sociale CNA

Gazetat britanike nisën të shkruajnë për Betin Louin kur ajo ishte 96-vjeçe. Pavarësisht se e kishte kaluar moshën e pensionit, ajo ishte ende vullnetare në një kafene në Spitalin Salford Royal në Mançester të Britanisë së Madhe, duke shërbyer kafe, duke larë enët dhe duke biseduar me pacientët.

Pastaj Loiu mbushi 100-vjeçe. ?Vazhdon të punojë vullnetare në spital?, shkruhej në titujt e mediave. Pastaj ajo arriti 102-vjeç, pastaj 104. Edhe kur ishte 106-vjeçe, Loui do të punonte në kafene një herë në javë, megjithëse shikimin e kishte të dobët. Beti u tha gazetarëve që e intervistuan, se arsyeja pse vazhdoi të punonte në kafenë e spitalit edhe shumë kohë pasi shumica e njerëzve do të kishin zgjedhur të largoheshin, ishte sepse besonte se vullnetarizmi e mbante atë të shëndetshme. Dhe ndoshta kishte të drejtë.

Shkenca zbulon se sjelljet altruiste, nga vullnetarizmi zyrtar tek dhurimi i parave, apo aktet e rastësishme të mirësisë së përditshme, nxisin mirëqenien dhe jetëgjatësinë e njeriut. Për shembull, studimet tregojnë se vullnetarizmi lidhet me një rrezik 24 për qind më të ulët të vdekjes së hershme -gati e njëjtë me ngrënien e 6 ose më shumë racioneve me fruta dhe perime çdo ditë. Për më tepër, vullnetarët kanë një rrezik më të ulët të glukozës në gjak, dhe një rrezik më të ulët të niveleve të inflamacionit të lidhura me sëmundjen e zemrës. Ata gjithashtu kalojnë 38 për qind më pak net në spitale, sesa njerëzit që i shmangen përfshirjes në akte bamirëse.

Dhe këto ndikime të vullnetarizmit mbi shëndetin e njerëzve, duket se gjenden në të gjitha cepat e botës, nga Spanja dhe Egjipti, në Ugandë dhe Xhamajkë.
Sigurisht, mund të ndodhë që njerëzit që nuk janë mirë me shëndet, nuk kanë gjasa që të merren me punë vullnetare. Për shembull nëse vuani nga një formë e rëndë e artritit, ka pak shanse që të doni të regjistroheni për të punuar në një kuzhinë ku gatuhet supë.

Disa eksperimente të rastësishme laboratorike, hedhin dritë mbi mekanizmat biologjikë përmes të cilave ndihma ndaj të tjerëve, mund të forcojë shëndetin tonë. Në një nga eksperimentet, nxënësit e një shkolle të mesme në Kanada u caktuan për 2 muaj si kujdestarë të fëmijëve të shkollës fillore, ose u vendosën në një listë pritje.

Katër muaj më vonë, ndryshimet midis 2 grupeve të adoleshentëve, ishin qartazi të dukshme në gjakun e tyre. Krahasuar me ata që ishin në listën e pritjes, gjimnazistët që po merreshin në mënyrë aktive me mësimin e fëmijët më të vegjël, kishin nivele më të ulëta të kolesterolit, si dhe shënjues më të ulët inflamatorë siç është Interleukina 6 në gjak, që përveçse është një tregues i fuqishëm i shëndetit kardiovaskular, luan një rol të rëndësishëm gjatë infeksioneve virale.
Por ndryshime në gjak nuk sjell vetëm angazhimi i vazhdueshëm në vullnetarizëm, por edhe gjeste të rastësishme të mirësisë. Në një studim në Kaliforni, pjesëmarrësve që iu caktua të kryenin akte të thjeshta mirësie, si blerja e kafesë për një të huaj, kishin një aktivitet më të ulët të gjeneve të leukociteve që lidhen me inflamacionin.

Dhe kjo është një gjë e mirë, pasi inflamacioni kronik ka qenë i lidhur me gjendje të tilla si artriti reumatoid, kanceri, sëmundjet e zemrës dhe diabeti.
Edhe nëse i bëni njerëzve në një skaner funksional të rezonancës magnetike (fMRI), dhe u thoni atyre të veprojnë në mënyrë altruiste, mund të shihni ndryshime në mënyrën se si truri i tyre reagon ndaj dhimbjes. Ekzistojnë shembuj të panumërt të efekteve pozitive shëndetësore të dashamirësisë, ashtu edhe të dhurimit të parave.

Për shembull, gjyshërit që kujdesen rregullisht për nipërit dhe mbesat e tyre kanë një rrezik vdekshmërie deri në 37 për qind më të ulët, ndryshe nga ata që nuk e ofrojnë një kujdes të tillë për fëmijët. Ky është një efekt më i madh, sesa ai që mund të arrihet nga ushtrimet e rregullta fizike.
Nga ana tjetër, shpenzimi i parave për të tjerët dhe jo për kënaqësinë tuaj, mund të çojë në dëgjim më të mirë, gjumë të përmirësuar, dhe presion më të ulët të gjakut, me efekte po aq të mëdha, si ato të fillimit të pirjes së ilaçeve të reja kundër hipertensionit./Përshtatur nga CNA.al

Burimi: https://www.bbc.com/future/article/20201215-why-being-kind-to-others-is-good-for-your-health