Protesta e djeshme/ Mentor Kikia: Policia e Lleshajt ka treguar se është e dhunshme dhe agresive

10 Dhjetor 2020, 16:06, Aktualitet CNA

Gazetari Mentor Kikia tha për Euronews Albania se protesta e zhvilluar dje për të kërkuar drejtësi për vrasjen e të riut Klodian Rasha nga një efektiv policie është një lajm i mirë, përtej dëmeve ekonomike që mund të ketë shkaktuar, pasi sipas tij çdo protestë tregon se shoqëria është vitale.

Sipas tij, protesta e djeshme është thellësisht politike, pasi mesazhi është i qartë, kërkohet dorëheqja e ministrit të Brendshëm, por ajo duhet ndarë nga partiakja.

?Mesazhi është i qartë, kërkohet dorëheqja e ministrit, kjo protestë është thellësisht politike, por duhet ndarë nga partiakja. Çdo protestë në thelb është politike, aq më tepër që në këtë rast i drejtohet drejtpërdrejtë kryeministrit e ministrit?, tha z. Kikia.

Rasti i kësaj ngjarjeje sipas z. Kikia nuk ka të bëjë vetëm me një polic, por me mendësinë drejt të cilës sipas tij po rrëshqet policia nën drejtim e Sandër Lleshajt, që duket më agresive dhe e dhunshme.

?Rasti i kësaj ngjarjeje është se nuk kemi të bëjmë me një vrasje shtetërore, as me vrasje me paramendim, kemi të bëjmë me një incident të tipit; personi që s?ka ndaluar duhet të ketë pasur një arsye, nuk u vra se nuk kishte maskë apo kishte thyer orën policore, ka pasur diçka që ende s?është sqaruar. Problemi është pak më i thellë.

A ka këtu një frymë që polici ka nxjerrë armën duke menduar se uniforma apo eprorët do të mbrojnë? Policia e Lleshajt ka treguar se është më e dhunshme, më agresive. A kemi një rrëshqitje të policisë drejt elementit të dhunës?? u shpreh z. Kikia.

Ai tha se përgjegjësia në rastin e kësaj ngjarjeje është e trefishtë; personale, administrative dhe morale, teksa theksoi se kjo e fundit ka të bëjë me një mentalitet dhe kulturë që pothuajse nuk ekziston në Shqipëri.

Dhe përgjegjësia e fundit është morale dhe politike që s?ta detyron askush ta mbash, por lidhet me përgjegjësinë politike dhe njerëzore që ka drejtues i institucioneve. Por politikanët tanë nuk e bëjnë këtë gjë, ne kemi paguar kosto shumë të rënda për njerëz që nuk e ndiejnë përgjegjësinë e dorëheqjes. Në ?97 u dogj Shqipëria se Berisha nuk jepte dorëheqjen. Dorëheqja është një çështje e kulturës dhe mentalitetit të cilin ne nuk e kemi?, tha gazetari./euronews