Toka është shumë më pranë një vrime të zezë, se sa ishte menduar më parë

29 Nëntor 2020, 07:39, Blog CNA

Ne jemi 2.000 vjet dritë më afër Shigjetarit A*, vrima e zezë në qendër të galaktikës sonë, që ka një masë rreth 4 milion herë më të madhe se ajo e Diellit, sesa ishte vlerësuar deri më tani. Në këtë përfundim mbërrin një studim i ri nga studiuesit e një projekti japonez të astrometrisë, një degë që merret me matjet, pozicionet dhe lëvizjet e objekteve qiellore, që kanë zhvilluar një hartë të re tredimensionale të Rrugës së Qumështit.

Përmes saj, ata kanë treguar se jo vetëm që jemi më pranë vrimës së zezë super të madhe, por gjithashtu se po lëvizim pak më shpejt sesa vlerësohej deri më tani. Por e theksojmë që në fillim, se nuk ka asnjë arsye për t?u shqetësuar.

Këto të dhëna, të botuara në botimin e ?Shoqërisë Astronomike të Japonisë?, nuk do të thonë se po i afrohemi një vrime të zezë, por përkundrazi se kjo hartë e re na jep një masë më të saktë të distancës midis nesh dhe Shigjetarit A*.

Pas 15 vitesh mbledhje të dhënash, duke përdorur teknikën e interferometrisë, nga teleskopët në të gjithë Japoninë (për të pasur një rezolucion të barabartë me një teleskop me diametër 2.300 kilometra), studiuesit e projektit Vera, i kombinuan ato me të dhëna nga vëzhgime të tjera të kohëve të fundit, për të krijuar atë që në thelb është harta më e saktë tredimensionale e pozicionit dhe shpejtësisë së Rrugës së Qumështit.

Duke identifikuar pozicionin dhe shpejtësinë e rreth 99 objekteve qiellore, ekipi ishte në gjendje të llogariste se vrima e zezë shumë e madhe që gjendet në qendër të galaktikës sonë është në fakt 25.800 vjet dritë larg nga Toka, dhe për këtë arsye gati 2.000 vjet dritë më afër sesa vlerësohej më parë.

Në vitin 1985, Unioni Astronomik Ndërkombëtar, e kishte identifikuar atë vrimë në një distancë 27.700 vjet dritë nga ne, ndërsa vitin e kaluar ai u rillogarit dhe u pozicionua në një distancë më të shkurtër, të barabartë me 26.673 vjet drite.

Të dhënat treguan gjithashtu se Toka po lëviz më shpejt sesa mendonim. Sipas disa modeleve të mëparshme, shpejtësia orbitale ishte rreth 220 kilometra në sekondë, ndërsa sipas rezultateve të hartës së re, planeti ynë udhëton me një shpejtësi më të madhe, të barabartë me 227 kilometra në sekondë.

Studiuesit shpresojnë tani që ta përsosin këtë hartë, veçanërisht duke vëzhguar objektet më të afërta me vrimën e zezë, dhe duke bashkëpunuar me një projekt edhe më të madh, Rrjetin Vlbi të Azisë Lindore, për të rritur gamën e radioteleskopëve./ Përshtati në shqip CNA.al