KQZ/ Kryetarja e Komisionit Rregullator ish shefe kabineti e Komisionerit

17 Nëntor 2020, 17:26, Politikë CNA

Komisioni Rregullator është një nga organet drejtuese të KQZ-së Re, për të cilin formulat e përfaqësimit dolën nga ambjentet e ish-pallatit të kongreseve.

Kuvendi shpalli aplikimet për vakancat duke ftuar personalitet publike që të aplikonin për organet e reja të KQZ-së së Re.

Mungesa e prezencës dhe interesit të individëve me ndikim në publik, u bë evidente kur u publikua lista e kandidaturave.

Me përjashtime të vogla të rasteve, për të cilat ishin të tepërt edhe gishtat e njërës dorë, në Kuvend u organizuan seanca dëgjimore me kandidatët.

Kuvendi me sa duket hoqi dorë haptazi dhe në kundërshtim me ligjin nga kriteri “personalitet publik” sa kohë që stisi një procedurë që mund t?i shërbejë njohjes nga publiku për individë të panjohur e jo të atyre që kodi zgjedhor kërkonte si kriter për drejtimin e KQZ.

Tashmë organet e reja janë ngritur. Plotësimi ose jo i kriterit të mishërimit të personalitetit publik nga të zgjedhurit e Kuvendit, duket çështje e tejkaluar.

Të paktën deri në momentin që politika të mos ketë nevojë të godasë individët e zgjedhur në ato organe. Kur t’u duhet, nuk është çudi që segmente të caktuara të hapin debatin edhe për kriterin e munguar të anëtarëve të organeve drejtuese të KQZ.

Një nga “personalitetet publike” që aplikoi për KQZ-në e Re, është edhe Ilirjana Nano.

Por kush është Ilirjana Nano?

Kryetarja e Komisionit Rregullator ka qenë shefe kabineti e Ilirjan Celibashit, kur ky ishte Ministër Shteti për Marëdhëniet me Parlamentin.

Më pas, pasi Celibashit ju pranua dorëheqja nga Kryeministri Rama, Celibashi punësoi Ilirjana Nanon në studion private që vazhdon funksionimin edhe sot.

Më pas Ilirjana Nano angazhohet në detyrën e Sekretares së Përgjithshme në KLP kur kryetar u zgjodh Gent Ibrahimi, ish-shok kursi i Celibashit.

Ilirjana Nano në Shtator 2020 depoziton letrat në Kuvend dhe njofton dëshirën për t’u angazhuar në KQZ-në e Re.

Kandidimi i saj ndodhte ndërkohë që bazuar në indicie mbi disa problematika të funksionimit të pjesës Administrative të Këshillit, Këshilli i Lartë i Prokurorisë inicionte në korrik 2020 një verifikim të situatës që kishte lidhje me detyrën e Ilirjana Nanos si Sekretare e Përgjithshme.

Ky ishte konteksti kohor gjatë të cilit Nano kandidonte me personalitetin e vet publik dhe me dëshirën për të kontribuar edhe në KQZ-në e Re.

Me urdhër të Kryetarit të Këshillit zotit Gent Ibrahimi, për rastin u ngrit Komisioni Disiplinor i cili hetoi problematikat e situatës së krijuar bazuar në konstatimet dhe gjetjet e pasqyruara në dy memo të mbajtura nga këshilltarët e Kabinetit të Kryetarit të Këshillit dhe nga stafi administrativ i Këshillit. Më datë 10.07.2020, Komisioni Disiplinor vendosi të fillojë ecurinë disiplinore për punonjësen znj. Ilirjana Nano, në cilësinë e Sekretarit të Përgjithshëm dhe me datë 10/07/2020, asaj ju njoftua pezullimi i përkohshëm nga detyra.

Në përfundim të procesit, Komisioni Disiplinor konstatoi se veprimet dhe mos veprimet e saj si Nëpunësi më i Lartë i Shërbimit Civil në institucion, kishin sjellë pasoja të rënda për funksionimin normal të KLP, duke pasur dëme materiale dhe financiare.

Ne nuk mund të gjykojmë mbi dosjen apo provat dokumentare mbi të cilat disponoi Komisioni Disiplinor në KLP.

Por mund të referojmë që nga verifikimet gjatë procedurave disiplinore, veprimet e zonjës Nano u konsideruan si shkelje shumë të rënda, të parashikuara në Ligjin e 152/2013 për ?Nëpunësin Civil?, neni 57, pika 1, germa ?a?, dhe komisioni në përfundim të procesit pasi ka evidentuar shkeljet në Vendimin e tij Përfundimtar ka vendosur marrjen e masës disiplinore ?Largimin nga shërbimi civil? për znj. Ilirjana Nano me detyrë Sekretar i Përgjithshëm i Këshillit të Lartë të Prokurorisë.

Ky është personaliteti publik që drejton sot Komisionin Rregullator në KQZ-në e Re.

Drejton organin që përgatit, vë në provë dhe shfaq për publikun shfaqjet teatrale me titull: “shqyrtimi dhe miratimi i akteve nënligjore në zbatim të Kodit Zgjedhor”.

Shikim të këndshëm!/ CNA.al