E fundit!

13:13 Opinione Eduard Halimi

Si ta kuptojmë atë që po ndodh në Aeroportin e Vlorës?

Si ta kuptojmë atë që po ndodh në Aeroportin e Vlorës/ 7 K...

Zgjedhjet në SHBA/ Presidenti Trump mposht studiuesin Biden në Karolinën e Veriut

13 Nëntor 2020, 22:29, Kosova & Bota CNA

Presidenti Donald Trump ka fituar shtetin e betejës elektorale, Karolina e Veriut, përballë kandidatit demokrat Joe Biden.

Presidenti Trump bëri fushatë agresive në Karolinën e Veriut me tubime me pjesëmarrje fizike në kulmin e pandemisë së koronavirusit, siç ishin takimet në Fayetteville, Winston-Salem dhe Greenville. Zoti Biden përgjithësisht shmangu fushatën fizike elektorale dhe nuk e vizitoi personalisht këtë shtet në 16 ditët e fundit para zgjedhjeve.

Guvernatori demokrat Roy Cooper pati rezultate shumë më të mira se Biden, duke fituar garën e tij kundër Guvernatorit të Përgjithshëm republikan Dan Forest natën e zgjedhjeve të 3 nëntorit, me më shumë se 4 pikë përqindje.

Ekipi elektoral i zotit Biden shpresonte që numërimi i deri në 116’000 fletëvotimeve me postë në ditët e mëvonshme do të zhvendoste balancën në favor të tij, por nuk arriti t’ia kalojë Presidentit Trump. Sidoqoftë, me fitoren e zotit Biden në Pensilvani, ai i kaloi 270 votat elektorale të nevojshme për të fituar zgjedhjet presidenciale. Fitorja e Presidentit Trump në Karolinën e Veriut i jep atij 15 vota elektorale, duke ulur disavantazhin e tij në 290-232.

Biden ruan një avantazh të lehtë në Xhorxhia, shtet me 16 vota elektorale. Gara mbetet shumë e ngushtë për të shpallur fituesin dhe po i nënshtrohet një auditi.

Ish-Nënpresidenti Biden shpesh kritikoi menaxhimin e krizës së koronavirusit nga Presidenti Trump dhe vendimin e tij për të mbajtur tubime fizike me pjesëmarrës që mbanin maskën shumë pak. Presidenti Trump u përpoq të bindte votuesit se ai do të ishte më i përgatituri për të rikthyer ekonominë në forcën e saj të periudhës përpara pandemisë.

Presidenti Trump e fitoi Karolinën e Veriut në vitin 2016 përballë kandidates së atëhershme demokrate Hillary Clinton. Ish-Presidenti Barack Obama ishte demokrati i fundit që fitoi garën presidenciale në Karolinën e Veriut, në vitin 2008./ VOA