Asnjë goditje në merkato, Ilir Daja tregon si do funksionojë Partizani këtë sezon

3 Tetor 2020, 07:20, Sport CNA

Për trajnerin Ilir Daja Partizani ka shumë probleme, sidomos në repartin mbrojtës. Tekniku i të kuqve tha se aty duhet të punojnë të gjithë, për atë që ai e quajti faza mbuluese e repartit mbrojtës. Daja në prononcimin e dhënë pas miqësores me Lushnjën, që u mbyll në shifrat 0-0, shpjegoi edhe arsyet pse ka zgjedhur skuadrat e Kategorisë së Parë për miqësore në këtë periudhë përgatitore.

Profesor, jemi në një situatë të pazakontë, stërvitje dhe ndeshje miqësore. Ju si e komentoni?
Sigurisht që është një situatë e pazakontë, e cila na vështirëson edhe për programimin e javës stërvitore. Në fund fare, duke qenë se nuk kemi një datë fikse të fillimit të kampionatit nuk kemi dhe një pikë orientimi se çfarë duhet të bëjmë gjatë gjithë javës.

Si ka ndikuar shtyrja e fillmsezonit te Partizani?
Gjithsesi, kjo ndërprerje e kampionatit na ka bërë mirë. Flas në planin sportiv. Për arsye të politikave sportive, sigurisht, që janë drejtuesit ata që mund të merren më shumë me situatën.
GJK_3042-1536x1024
Po në aspektin teknik?
Në aspektin teknik na ka bërë mirë, sepse kemi shumë probleme ashtu siç e pamë edhe sot (dje), ku akoma nuk kemi konsoliduar veprimet, qoftë në fazën mbrojtëse, qoftë në fazën sulmuese. Sigurisht që kjo e bën të vështirë sepse nuk e kemi të gjithë kontigjentin në dispozicion. Disa lojtarë titullarë kanë qenë me dëmtime. Kemi provuar deri tani lojtarë që mund t?i afrojmë drejt 11-shes së parë. Cara është një lojtar që mund ta fitojë shumë shpejt vendin e titullarit me paraqitjen që ka bërë. Ndërsa pjesës tjetër i duhet shumë punë për të marrë një fanellë, siç është ajo e Partizanit, që dihet se çfarë rëndësie dhe peshe ka.

A e keni të qartë formacionin me të cilin mund të filloni kampionatin?

Problemi nuk është vetëm startimi. Është një rrugëtim i gjatë. Problemi është edhe vazhdimësia. Të them të drejtën, kemi vështirësi edhe në konsolidimin e 11-shes së parë, sepse kemi, siç e kam përsëritur, ndarje jo të drejtë të lojtarëve nëpër reparte, gjë të cilën e vështirëson shumë reparti i mbrojtjes. Gjithsesi, duhet që të paktën këtë repart mbrojtjeje që e kemi me numër të kufizuar, do të përpiqemi të punojmë të gjithë në fazën e mbrojtjes, që këtë katërshe ose numër të limituar lojtarësh, të paktën, t?i krijojmë sa më pak probleme. Do të thosha që kjo është vështirësia më e madhe që kemi. Akoma nuk e kemi të konsoliduar manovrën, në mënyrë që të kemi një 11-she që lufton në të dyja fazat e lojës.