Përkujtohet 20-vjetori i vdekjes së dëshmorit Arben Zylyftari

2 Gusht 2020, 10:57, Aktualitet CNA

Është përkujtuar këtë të diel në Berat, 20 vjetori i rënies në krye të detyrës të dëshmorit Arben Zylyftari. Në këtë ceremoni morën pjesë drejtori i Policisë së Shtetit, Ardi Veliu, familjarë të dëshmorit, nënkryetari i Bashkisë së Beratit Luçiano Bojaxhiu, drejtori i Policisë së Beratit si dhe miq të dëshmorit.

Gjatë fjalës së tij, drejtori i Policisë së Shtetit, Ardi Veliu tha se nuk ka kurajo më të madhe për punonjësit e Policisë së Shtetit, shembull më të fortë se ai i Arbenit, për ta bërë Shqipërinë vend më të drejtë.

“E kam të vështirë të flas për një oficer policie që ka humbur jetën në krye të detyrës në përballje me krimin, por e kam akoma edhe më të vështirë kur këto fjalë duhet t’i them për një nga miqtë me të cilin punova afër për një vit në Vlorë. Rënia e tij në krye të detyrës ka lënë gjurmë të forta tek unë. Zakoni e do që të thuhen fjalë të mira për atë që ikën nga kjo botë. Por Arbeni e kishte shkruar vetë respektin, mirënjohjen dhe dinjitetin në çdo ditë të detyrës së tij, me peshën e misionit që mbante mbi supe”,- tha Ardi Veliu.

Më tej drejtori i Policisë së Shtetit tha se të gjithë janë me sytë nga drejtësia e re.

“Arben Zylyftari dhe qindra dëshmorë të Policisë sakrifikuan jetën për vlera dhe parime, për drejtësi, rend e siguri për qytetarët, por fatkeqësisht këto 3 dekada, dora e pabesë që u ngrit mbi ty Arben ka më shumë se 3 dekada që përpiqet të sfidojë shtetin, ligjin e drejtësinë dhe drejtësia e vjetër rrallë u ka dhënë dënimin e merituar. Të gjithë sot jemi me sytë nga drejtësia e re”,- deklaroi Veliu.

Arben Zylyftari, kolonel i policisë shqiptare, u vra në krye të detyrës më 2 gusht të vitit 2000. Ish-kreu i Drejtorisë së Policisë së qarkut Shkodër kolonel Arben Zylyftari, është shpallur “dëshmor i atdheut” dhe është vlerësuar me titullin më të lartë “Gjergj Kastrioti Skënderbeu”, pas vdekjes, nga ish presidenti Rexhep Mejdani. Më 13 Dhjetor 2000, Akademisë së Policisë së Shtetit, iu dha emri, ?Akademia e Policisë Arben Zylyftari?. /CNA.al