Gara për kryetar të Komisionit të Prokurimit Publik/ Dy prej kandidatëve në shkelje të ligjit

4 Korrik 2020, 12:19, Politikë CNA

Dhjetë ditë më parë kryeministri Edi Rama ka shkarkuar nga detyra kryetaren e Komisionit të Prokurimit Publik, Evis Shurdha për shkak të përplasjeve të forta që kanë pasur mes institucioneve për tenderin e rrugës Kardhiq-Delvinë

Pas shkarkimit të kryetares së Komisionit të Prokurimit Publik, tashmë duhet zgjedhur zyrtari i ri i këtij institucioni, por ligji ka disa kritere se kush mund ta drejtojë. Ndërkohë ai është institucion mjaft delikat dhe aty do të trajtohen ankesat e biznesit, proceduart e prokurorimeve publike. Pra, kur zhvillohet një tender, njëra palë ankimohet dhe institucioni final që vendos është ky institucion.

Quhet si institucion i pavarur, por në fakt ka një varësi direkte nga kryeministri, është një institucion në varësi të kryeministrit, por aktorë dhe faktorë të ndryshëm gjithmonë duan ta kapin këtë institucion. CNA.al ka mësuar nga të dhënat se dy prej kandidatëve Jonaid Myzyri dhe Taulant Godroli nuk i plotësojnë kriteret dhe janë në shkelje të ligjit.

Po të shohim ligjin, thotë qartë se anëtari i Komisinit të Prokurimit Publik mund të zgjidhet shtetasi shqiptar që plotëson këto kritere: Ka zotësi të plotë për të vepruar, ka arsim të lartë në Drejtësi, ka mbi 8 vite përvojë pune të paktën 3 vite në fushën e prokurimeve dhe të paktën 2 vite në një pozicion drejtues. Nga ana tjetër janë vendosur emrat të cilët në shkelje të ligjit duan të marrin drejtimin e Komisionit të Prokurimit Publik për ta pasur si një instrument politik.

Këshilli i Ministrave ka kualifikuar në kundërshtim me nenin 19/3 të Ligjit të Prokurimit Publik, kandidatët për Kryetar të KOMISIONIT TË PROKURIMIT PUBLIK. Kandidati i klasifikuar i pari, Jonaid Myzyri, nga Këshilli i Ministrave nuk plotëson 2 nga kriteret parashikuara në nenin 19/3 pika 2 dhe konkretisht: 1) Nuk plotëson kriterin e vjetërsisë 8 vite përvojë pune, pasi në vitin 2014 ka përfunduar studimet dhe 2) nuk plotëson kriterin 2 vite në pozicion drejtues pasi maksimumi i eksperiencës drejtuese të tij është pozicioni Shef Sektori për 8 muaj.

Referuar Ligjit 152/2013 Për Nëpunesin Civil në nenin 19 klasifikohen pozicionet dhe kategoritë e nëpunësve civilë dhe në piken 6, gërma ?a? të nenit 19 përcaktohet se pozicioni Shef Sektori si Kategori e ulët drejtuese. Po kështu kandidati i klasifikuar i dyti nga Këshilli i Ministrave, Taulant Godroli nuk plotëson kriterin e eksperiencës dhe kriterin e pozicionit drejtues, pasi eksperienca e vetme e këtij kandidati është Jurist në sektorin privat.
Gjithësej janë 7 kandidatë që garojnë për këtë post, emrat e të cilëve janë publikuar në faqen zyrtare të kryeministrisë.

Këta 7 kandidatë janë kualifikuar për fazën e dytë për kryetar të Komisionit të Prokurimit Publik që në datën 30 qershor të këtij viti. Tashmë pritet të zgjidhet emri i cili do të vendoset në krye të Komisionit të Prokurimit Publik edhe pse lista kryesohet nga dy kandidatë të cilët nuk plotësojnë kriteret për të qenë në krye të këtij institucioni./CNA.al