“Poeti më elegant i vargjeve erotike të letrave shqipe”/ Profesori Korçar dedikim në kujtim të Klito Fundos

28 Maj 2020, 11:03, Kulturë CNA

Intelektuali korçar dhe shkencëtari Prof. Dr. Ilia Ballauri ka bërë një dedikim në nderim të poetit Korçar, Klito Fundo, nipi i Zai Fundos, i pushkatuar nga regjimi i Enver Hoxhës.

Në një postim në rrjetet sociale, Prof. Dr. Ilia Ballauri e cilëson Klito Fundon, si poetin më elegant të vargjeve erotike të letrave shqipe.

?Në kujtim të Klito Fundos
Poetit më elegant të vargjeve erotike të letrave shqipe (sipas mendimit tim), që i thesh të gjitha vetëm me kulturë dhe fjalë të ëmbla, që mbeti gjithmonë në hije, kam sjellë këto vargje erotike të përkthera prej meje, nga një tjetër poet erotik, të shek të 6-të, Paulus Silentiarius?-shkruan ndër të tjera Prof. Dr. Ilia Ballauri.

Më poshtë postimi i plotë:

NË KUJTIM TË KLITO FUNDOS

Poetit më elegant të vargjeve erotike të letrave shqipe (sipas mendimit tim), që i thesh të gjitha vetëm me kulturë dhe fjalë të ëmbla, që mbeti gjithmonë në hije, kam sjellë këto vargje erotike të përkthera prej meje, nga një tjetër poet erotik, të shek të 6-të, Paulus Silentiarius

Më pëlqen edhe dua,
në duar të mbaj dy mollët e tua, ?
(nxjerrë nga Antologjia Palatine vol. 5-të, nr. 258)

Filini!
Më të ëmbëla janë ravijëzimet,
që mosha së bashku me kujtimet,
të la në fytyrë,
se sa,
lëngështimi i qumshtë i rinisë,
shënjë e papjekurisë.

Filini!
Sido që të jetë, më pëlqen edhe dua,
në duar të mbaj dy mollët e tua,
dy mollë të mëdha, të bëra, të rënda,
që poshtë degës varen të ëmbla.

Jo!
Më mirë mollët e tua, të buta kuqoshe,
se sa të rejat, përpjetë majoshe.

Filini!
Vjeshta jote, më lart, më bukur qëndron,
pranverës ja hedh, ja stërkalon.
Ti ke dimër të nxehtë, ke prush, përvëlon,
më tepër se korriku që tjetra ofron.

Shqip: Ilia V. Ballauri

Me Klito Fundon dhe Emilin, pavarësisht diferencave në moshë më lidhnin shumë gjera, por mbi te gjitha nëna e tyre fisnike, Fillareti, shoqe e ngushte e nënës time dhe mësuesja ime e parë e anglishtes.
Ikën këta njerez … ikën, udhëtojne monopateve pa fund të harreses, koha bën të sajen.

P. Silentiarios ishte poeti bizantin më i dëgjuar i shek. 6-të pas Kr., por për fat të keq, rreth tij dihen pak gjëra. Kështu për të dihet vetëm se, në oborin e perandorit Justinian, ai kish funksionin e lartë të Silentiariusit (ruajtësit të qetsisë), pra funksionin e kryeshambellanit (mes tridhjet të tillëve). Thuhet pastaj, se ai rridhte nga një familje fisnike dhe se kish një erudicion të gjërë. Ai njihet si autori i 79 epigramave lirike dhe erotike, një prej të cilave është edhe e mësipërmja.