E fundit!

18:07 Aktualitet

Komisioni i Reformës Zgjedhore kërkon shtyrjen e afatit të punës

Komisioni i Posaçëm i Reformës Zgjedhore ka bërë kërkesë K...

Zbulohen prapaskenat në prag të rifillimit të kampionatit, ja çfarë po ndodh te Skënderbeu

15 Maj 2020, 11:41, Sport CNA

Vendimi për rifillimin e kampionatit e gjen Skënderbeun në moment jo fort të mirë për sa i përket gjendjes fizike. Ndryshe nga disa ekipe të tjera të Superiores, korçarët kanë qenë të gjithë të shpërndarë dhe në pamundësi për të punuar në seanca stërvitore qoftë edhe virtuale përmes videostërvitjeve. Kjo edhe për shkak të mbylljes së liridaljes në një orar të kufizuar.

Gjithsesi, përpos kësaj situate, bardhekuqtë kanë nxituar për të bërë gati terrenin e punës dhe për të filluar nga përgatitjet kur të jepet drita jeshile. Duke parë faktin që kampionati ishte drejt rifillimit, trajneri i Skënderbeut, Ilir Daja, u dha futbollistëve të tij një program individual intensiv, që në bazë të lirimit të masave shtrënguese ishte e mundshme ndjekja e këtij programi.

Teksa prej ditës së hënë, ekipi ka filluar intensifikimin e programit individual. Bardhekuqtë kanë filluar të rrisin ngarkesat, pasi edhe koha e shkurtër në dispozicion nuk i premton të marrin maksimumin gjatë kësaj kohe përgatitjesh që do të caktohet deri në datën 3 qershor. Burime pranë klubit bëjnë me dije se lojtarëve u është kërkuar zbatim strikt i masave dhe përgatitjeve, ndërsa nga ana tjetër një pjesë e lojtarëve kanë filluar përgatitjet edhe në terren, kryesisht në zonat e gjelbra.

RIKTHIMET

Problem kyç mbeten rikthimet e lojtarëve nga jashtë. Bëhet fjalë për futbollistët, të cilët periudha e izolimit i gjeti jashtë Shqipërisë dhe kjo e bën mjaft të vështirë përgatitjen e tyre. Për këta klubi bën me dije se do të ndjekë të gjitha protokollet e vendosura nga qeveria dhe FSHF për të rikthyer lojtarët në ekip. Por duket se një plan është ai i testimeve për të shmangur karantinimin e detyruar për 14 ditë.

JASHANICA

I vetmi që duket më përpara pjesës tjetër të ekipit është Jashanica. Kosovari shihet i favorizuar nga pajisja me pasaportë shqiptare që e zotëron prej vitesh. Kjo i lejon të kthehet në Shqipëri ende pa u hapur kufijtë për kalimin e shtetasve të huaj. Për këtë arsye pritet që Jashanica sot ose të shtunën të jetë në Durrës, atje ku do të nisë edhe përgatitjen individuale.