Kukësi gjen zgjidhje për lojtarët nga Maqedonia dhe Kosova

15 Maj 2020, 07:21, Sport CNA

Me bërjen publike të vendimit për rinisjen e kampionatit në datën 3 qershor, drejtuesit e Kukësit kanë marrë menjëherë masat. Së pari, nënkampionët kanë plotësuar organikën duke zgjidhur një problem shumë të madh për ta, pikërisht rikthimin në Shqipëri të lojtarëve të mbetur jashtë kufijve.

Plot 7 lojtarë të Kukësit ndodheshin prej më shumë se dy muajsh në shtëpitë e tyre në Kosovë dhe Maqedoninë e Veriut. Më konkretisht kapiteni Besar Musolli, Enis Gavazaj, Zenel Gavazaj dhe Ilir Avdyli ishin në Kosovë. Lista vazhdonte me Edis Maliqin dhe Valon Ethemin, të cilët ndodheshin në Shkup dhe Tetovë, ndërsa Vasil Shkurtaj në Spanjë.

Klubi prej gati 3 javësh po merrej me plotësimin e dokumentacionit dhe procedurave përkatëse për riatdhesim e Musollit dhe vëllezërve Gavazaj, të cilët janë të pajisur me pasaportë shqiptare.

Me konfirmimin e vendimittë për rinisjen e kampionatit, klubi ka arritur të sjellë në Shqipëri pa probleme lojtarët në fjalë. Të gjithë futbollistët janë karantinuar në banesat e tyre, pasi rregullorja ka ndryshuar për personat që kanë kontratë pune. Ata kanë zbatuar gjithë rregulloren dhe protokollin e shtetit.

RREGULLORJA ? Gazeta mëson se në kufi lojtarët nuk kanë kryer testime, por kanë matur temperaturën dhe kanë plotësuar formularët me gjithë informacionin e nevojshëm për autoritetet. Pastaj ata janë regjistruar në listën e personave që do të karantinohen për 14 ditë në banesat e tyre në Tiranë.

Klubi ua ka siguruar gjithë terrenin lojtarëve për t?u stërvitur dhe për të kryer të gjitha nevojat e tyre të përditshme në banesë. Këta lojtarë do të vazhdojnë të stërviten në kushte shtëpie edhe kur ekipi të nisë stërvitjen zyrtarisht. Vetëm në rast të ndonjë ndryshimi rregulloreje mund të ketë liri edhe për këta lojtarë. Siç duhet tashmë, Vasil Shkurtaj mbushi dy javë që është kthyer nga Spanja, duke e kryer garantimin 14-ditor dhe të hënën do të jetë gati.

PROBLEMI ? I vetmi lojtar që ka mbetur jashtë kufijve të Shqipërisë është Vesel Limaj, i cili ndodhet në Berlin pranë familjes. Mesfushori nuk ka asnjë mundësi të rikthehet në Tiranë, pasi s?ka linjë ajrore dhe gjithashtu kufijtë janë të mbyllur.

Edhe pse Limaj mund të kërkojë të rikthehet apo klubi ka bërë kërkesë për të rikthyer punëmarrësin e tyre, autoritetet përkatëse nuk mund të bëjnë asgjë për shkak të transportit. Klubi shpreson që të rihapen sa më shpejt linjat ajrore dhe të rikthejnë mesfushorin, i cili është një pikë mjaft e fortë.