Si mund ta bëjë Shqipëria, diferencën për turizmin dhe biznesin

10 Maj 2020, 10:40, Ekonomi CNA

Bashkimi Europian ka njoftuar hapjen, por direktivat e dhëna duket se janë për lëvizjet e brendshme, pra heqjen e mbylljes së kufijve të vendosur nga vendet anëtare të BE-së dhe lirimin hap pas hapi, por kjo jo ndaj gjithë vendeve që janë pjesë e Shengenit, ku përfshihet edhe Shqipëria.

Pra pritet të ketë një hapje, por europa sërish do jetë e mbyllur për shumë vende si Shqipëria.

Nga ana tjetër Shqipëria ka në dorë rastin e artë për të bërë diferencën për turizmin dhe biznesin. Që të vijnë turistët ata duhet të kenë garanci se në Shqipëri nuk ka Covid, por edhe Shqipëria duhet të ketë garanci se personat që vijnë nuk janë të infektuar.

Cila është zgjidhja?

Tamponi në Rinas qoftë edhe me kosto minimale, ndoshta jo me çmimet e Vjenës ku deklarohet rreth 200-250 euro, por me një kosto minimale e subvencionuar nga shteti deri në një farë mase. Tamponi në Rinas do të ishte një avantazh jo vetëm për turistët por edhe për biznesin. Nuk mund të vijë një biznesmen në Shqipëri edhe po u hapën kufijtë dhe pastaj të vazhdojë të presë kushtet e karantinës 10 ditë, një javë apo dy javë.

Qeveria duhet të marrë masa që të bëjë diferencën. Pra biznesmenët që vijnë në Shqipëri mund ta bëjnë tamponin në Rinas, mund të deklarojnë banesën ku qëndrojnë dhe të jenë të mbyllur deri 48 orë, brenda kohës që del përgjigja. Pas daljes së përgjigjes, personi mund të njoftohet me telefon që të vazhdojë të lëvizë i lirë, ose të qëndrojë në karantinë në rast se konstatohet se është pozitiv.

Bërja e tamponit në Rinas do t’i jepte një shans të madh Shqipërisë. Së pari, do të çlironte biznesin të vinte, të hynte dhe të lëvizte lirisht. Sot me krizën ekonomike, me pasojat e Covidit dhe goditjen e fortë që ka marrë Shqipëria, lëvizja e biznesit do të jetë zgjidhja më emergjente që do të japë shteti.

Nga ana tjetër turizmi nuk mund të lihet rastësisht. Nuk mund të merren turistët dhe të futen në karantinë, prandaj shërbimi ndaj tyre do t’i jepte një tjetër avantazh Shqipërisë dhe do të tërhiqte vëmendje. E në rast se kritikët apo kundërshtarët e hapjes do të thonë se mund të shfaqen më vonë simptomat se mbase në atë moment nuk janë shfaqur ende, qeveria mund ta zgjidhë duke mos u bërë thjesht tamponin, por duke u bërë analizën e gjakut që është edhe më e sigurt, edhe këtë duke e subvencionuar sërish deri në një farë mase.

Kështu biznesmenët do të vinin lirisht dhe Shqipëria do të dekarohej një vend që ti mund të hyje, mund të vazhdoje punën si biznes, por më parë do bëje një analizë në portën hyrëse, që mund të jetë porti apo dogana, përshembull Kapshtica apo Kakavija që ka shumë fluks me Greqinë dhe është një nyjë ekonomike, Durrësi që është një tjetër nyjë ekonomike me Italinë, por pa asnjë diskutim edhe Rinasi që është porta kryesore e biznesit me Europën.

Prandaj qeveria duhet të kthejë sytë të shikojë, të kapë avantazhin që mund të ketë në këtë situatë dhe jo të vazhdojë me rregulla strikte dhe të qëndrojë mbyllur. Kush do hapet më shpejt, me kujdes dhe me siguri të plotë, do të jetë edhe përfituesi më i madh në këtë situatë që po e rëndon çdo ditë e më shumë ekonominë./ CNA.al