"Piku i rënies ekonomike 3-mujorin e dytë"/ Sejko trefon efektet e Covid-19: Parashikohet recesion

6 Maj 2020, 15:07, Ekonomi CNA

Guvernatori i Bankës së Shqipërisë Gent Sejko tha ditën e sotme se emergjenca e shkaktuar nga Covid-19 përbën një sfidë në stabilitetin financiar të vendit dhe për rritjen ekonomike.

Sejko tha se mbyllja e disa aktiviteteve të prodhimit ka sjellë rënie të prodhimit, që pritet të shoqërohet me rënie të punësimit. Sipas tij, ekonomia do të shënojë pikun e uljes në 3 mujorin e dytë.

“Në këtë skenar pandemia do të lërë gjurmë të dukshme dhe kalimtare në ekonominë e vendit. Zgjatja potenciale e pandemisë do të sjellë ndikim më negativ në vend. Objektivi primar i duhet të jetë marrja e masave dhe masa për rritjen ekonomike në të ardhmen. Rritja e borxhit publik është kosto e pranueshme për rritjen e ekuilibrave të vendit. Këshilli mbikqyrës vëren se BSH ka marrë masat e duhura në kohë të duhur. Kemi lehtësuar kostot e operimit të pagesave elektronike.

Norma bazë e interesit do të jetë e pandryshuar. E pandryshuar do të jetë edhe norma e interesit për kredinë. Ulet kosotja e kredisë për sektorin privat. Rreziqet e kahut të poshtëm burojnë nga zgjatja e pandemisë. Ekonomia pritet të shënojë pikun e uljes në 3 mujorin e dytë”, u shpreh ai në një deklaratë për shtyp.

Teksa u pyet për efektet në ekonomi, guvernatori i BSH-së tregoi se parashikohet një recesion në rajon edhe më gjerë, ndërsa pretendon se do kemi një goditje kalimtare.

“Parashikimet janë për recension në rajon e më gjerë. Jemi të qartë për këtë. Mirëpo kjo është një goditje kalimtare. Që fundi i pandemisë të na gjejë të përgatitur, duhet të kemi një ringritje sa më të shpejtë. Duhet të jemi të kujdesshëm që ky impakt të mos godasë stabilitetin financiar dhe të mos prishet zinxhiri ekonomik. Duhet të kemi një stabilitet çmimesh që të mos ndikohet mirëqenia e qytetarëve shqiptarë. Edhe tërmeti bëri punën e tij. Pandemia e përkeqësoi edhe më shumë situatën në vend. Ka një pasiguri të lartë në parashikime. Sezoni turistik po vjen. Shpresojmë të kemi ulje të shifrave dhe një ringritje graduale të ekonomisë”, tha guvernatori./ CNA.al