“Në shënjestër pasuritë e krimit të organizuar”/ Lamallari: Akti Normativ mbron ekonominë e ligjshme

8 Mars 2020, 18:55, Aktualitet CNA

?Përmes shënjestrimit të pasurive të krimit të organizuar, Akti Normativ mbron ekonominë e ligjshme.?

Kështu ka deklaruar sot zëvendësministri i Brendshëm, Besfort Lamallari, i cili thotë se ligji i miratuar nga qeveria ka në fokus ekonominë e paligjshme.

Sipas tij, shënjestrimi, sekuestrimi dhe konfiskimi i pasurive dhe aseteve të krimit të organizuar cënon drejtpërdrejtë pushtetin financiar të grupeve dhe eksponentëve të krimit të organizuar.

?Dobësimi i pushtetit financiar të grupeve kriminale vlerësohet si goditje në thembrën e Akilit për krimin e organizuar. Shkatërrimi i potencialit ekonomik dhe përpjekjeve për pastrimin e të ardhurave kriminale mbron ekonominë e ligjshme, konkurencën dhe sipërmarrje ekonomike të ndërtuar dhe që funksionon mbi rregullat e tregut. Si i tillë akti përbën një garanci shtesë për parandalimin e injektimit të të ardhurave me origjinë kriminale në ekonominë e vendit?, u shpreh Lamallari gjatë një interviste për Agjencinë Telegrafike Shqiptare.

Zv.ministri deklaron se akti normativ sulmon dhe dobëson potencialin korruptues dhe infiltrues të krimit të organizuar. Ai tha se ndikimi social konsiston në heqjen dhe dobësimin e çdo motivi apo iluzioni për pasurim të shpejtë dhe të paligjshëm.

?Askush nuk do të ishte i gatshëm të rrezikojë përfshirjen në veprimtari të paligjshme fitimprurëse dhe dënimin penal, duke ditur fatin e paracaktuar të sekuestrimit dhe konfiskimit të të ardhurave të përftuara kriminale. Në këtë mënyrë ai mbron të rinjtë dhe grupet vulnerabël të shoqërisë ndaj ekspozimit, joshjes dhe rekrutimit nga krimi i organizuar?, vijon Lamallari.

Lamallari tregoi se deri më tani janë mbi 41 subjekte që u janë dërguar formularët e pasurisë dhe janë sekuestruar rreth 71 automjete.

?Ka patur që në fillim të punës së OFL janë qindra praktika të mbledhura nga drejtoritë vendore të policisë të përcjella në OFL dhe më pas duke vijuar edhe me hetimet që ata kryejnë dhe më pas përcillet formulari për vetëdeklarimin e pasurive që më pas plotësohet me dokumente shtesë dhe përcillet në prokurori. Janë mbi 40 shtetas që kanë marrë formular. Shumë prej tyre kanë plotësuar formularin sipas afatit kohor dhe janë përcjellë edhe në Prokurorinë e Posaçme. Kemi parë shumë pasuri të sekuestruara. Janë rreth 71 automjete, pasuri tokë truall, edhe komplekse. Janë diku mbi 85 praktika të përcjella nga OFL tek SPAK. Mesatarisht çdo ditë ka 2-3 kërkesa që përcillen, shpërndahen ndaj subjekteve të aktit normativ. Më pas vijohet me hetimin e pasurisë së tyre, dokumentohet çdo provë e mundshme dhe një punë e mirëkoordinuar me SPAK kanë sjellë këto vendimet e para, pra kërkesat për sekuestro?, theksoi zv.ministri./ CNA.al