E fundit!

11:46 Aktualitet

Balla, pyetje publike protestuesve

Kreu i grupit parlamentar të PS, Taulant Balla iu është dr...

Skandali me gjyqtaren/ Kërkon pagë pa qenë në punë, “fiton” gjyqin me kolegët në kohë rekord

6 Mars 2020, 13:00, Aktualitet CNA

Në fillim të muajit shtator 2017, gjyqtarja e Gjykatës Administrative, Fjoralba Prifti është ftuar nga Shkolla e Magjistraturës për të nënshkruar një marrëveshje mes Shkollës së Magjistraturës, Ambasadës Franceze dhe Këshillit të Shtetit të Republikës Franceze marrëveshje, e cila konsistonte në ndjekjen e një stazhi 8 javor kryesisht pranë Gjykatës Administrative të Melunit, Francë, por edhe në gjykata të tjera administrative franceze.

Prifti ka paraqitur kërkesë për leje pranë Këshillit të Lartë të Drejtësisë dhe kjo leje u aprovua nga Kryetari i Këshillit të Lartë të Drejtësisë.

Fjoralba Prifti, gjatë periudhës 1 tetor 2017 deri në 1 dhjetor të po këtij viti ka qenë më leje për të ndjekur një stazhin profesional në Gjykatën Administrative të Melunit në Francë dhe për rrjedhojë nuk ka kryer asnjë punë në gjykatën Administrative Tiranë.
Pasi është kthyer në Shqipëri, Prifti ka vënë re se zyra e financës pranë Gjykatës Administrative te Apelit nuk i ka paguar në llogarinë bankare pagën e muajit tetor 2017.

Burime për CNA.al bëjnë me dije se Prifti ka çuar fillimisht çështjen në Gjykatën Administrative të Shkallës së Parë, Tiranë.

Padia është regjistruar në shkallën e parë në datën 26 korrik të 2018-ës dhe vendimi është marrë në daten 08, tetor 2018, pra pas tre muajsh.
Çështja e rrogës së Fjoralba Priftit u gjykua nga kolegët e saj dhe gjyqtarja fitoi gjyqin.
Pasi fitoi gjyqin atje, me një shpëjtësi skëterrë, çështja e saj shkon në Apel dhe shqyrtohet në një kohë shumë të shkurtër.

Çështja është regjistruar në Apel në datën 14 nëntor 2018 dhe vendimi është marrë pas dy muajsh, në daten 17 janar 2019.
Relatori i çështjes, ku gjykatësja administrative e Apelit kishte paditur gjykatën ku punonte vetë, bashkë më kolegët e saj për t?i kthyer rrogat, ishte Artur Malaj.
Gjykata vendosi pranimin e kërkesë padisë dhe detyrimin e palës së paditur të paguajë pagën dhe kontributet e detyrueshme mbi të për sigurimet shoqërore dhe shëndetësore si dhe kontributet për pension suplementar, për muajt Tetor 2017 dhe Nëntor 2017 për paditësen Fjoralba Prifti.

Është për tu habitur fakti që çështja e gjyqtares ka filluar në korrik 2018 dhe ka përfunduar janar 2019, një kohë mjaft e shkurtër kjo në krahasim me çështjet e tjera që presin me vite të tëra.

Nëse sot Gjykata Administrative e Apelit ka pa shqyrtuar dosje prej 2 apo 3 vjetësh, çështja e gjyqtares u mbyll në një hark të shkurtër kohor duke mos respektuar radhën e dosjeve të tjera që presin të shqyrtohen.
Ndërkohë që në këtë Gjykatë rrinë me qindra dosje me dy apo tre vjet, çështja e Priftit u shqyrtua me shpejtësi skëterrë.

Në Gjykatën Administrative të Apelit, ka ende dosje të vitit 2016 pa shqyrtuar ndërsa zonja Prifti e fillon çështjen e saj në 2018 e mbyll pas 6 muajsh.
Nëse një qytetari i thjeshtë çon një çështje në Gjykatën e Apelit duhet një peridhë shumë e gjatë që kjo çështje të shqyrtohet, ndërsa çështja e gjyqtares u shqyrtua pas asnjë vonesë duke fituar kështu rrogën e dy muajve, koha kur ajo kryente stazhin në Francë.

Këto janë rastet kur zyrtari shfrytëzon postin e tij për interesat e veta. Si shpjegohet se kur një qytetar i thjeshtë, i drejtohet Apelit për një çështje të caktuar, procesi zgjat 2-3 vjet, ndërsa çështja e gjyqtares zgjati 2 apo 3 muaj?/CNA.al