Protezë, jo patericë!/ Pse Basha nuk mund t’ia shesë më sapunin për djathë shqiptarëve

19 Janar 2020, 08:59, Opinione CNA

Nga Armir Shkurti

Lexova se rrethi që merret me ruajtjen e fytyrës së Bashës na paska bërë një sofizmë ala Enver. Demek “kush është kundër tryezës së zgjedhjeve me Gjiknurin palë qenkësh patericë e Ramës”.
Të ziut popull, ngaqë ia kanë shkulur rrënjë e dhëmballë, i gëlltit pa përtypur dot meze të tilla. Kështuqë le të përpiqemi t’i çkoqisim ca, për ta bërë më të shijshme. (Për popullin, natyrisht!)

“Patericë e Ramës” domethënë se Rama po bie, por këta e mbajnë. Nga 2017 në fakt, që prej marrëveshjes së 17 majit, na shfaqet zoti Basha në këtë detyrë. Në 2 vjet e kanë stërholluar plot shqiptarë këtë marifet në shkrime e llafosje televizori… Po e heqim mënjanë këtë rradhë, për lehtësi argumenti, zotin Basha dhe i kthehemi Pi Arit të tij, që xhyben e “pateticës së Ramës” ia zhvesh Lulit e ua hedh supeve KUNDËRSHTARËVE të mishmashit të Bashës.
Për të mbajtur Ramën më këmbë, “patericat” e tij hidhen kundër pranisë së Gjiknurit në tryezë, si njeriu të cilit i kanë dalë përgjime për shitblerje vote. Ose më thjeshtë: patericat e Ramës janë kundër tryezës së bisedimeve për reformën zgjedhore.
…që i bie se “patericat e Ramës” pengojnë zgjedhjet? Duke e thjeshtuar më tej thyesën: Rama (përmes patericave) shprehet kundër pranisë së Gjiknurit në tryezë, sepse është kundër tryezës, për rrjedhim kundër reformës zgjedhore?
PO PËR Ç’ARSYE?

Pyetje:
– Zgjedhjet e 2017-ës i deformoi kodi zgjedhor apo TRYEZA dhe marrëveshja Rama – Basha?
– Partitë e tjera i preu në besë Kodi Zgjedhor apo marrëveshja që dogji koalicionet?
– Nëse mbetemi brenda proporcionalit (rajonal, kombëtar, i korrektuar qoftë) a mbetet po njëlloj pozita e kryetarit si pronar i partisë dhe i plotfuqishëm në vendime e emërime?
– Ja dhe u bë reforma. A do futet në zgjedhje me Ramën Basha?
– Përveç varfërimit dhe mërzitjes së shqiptarëve, ç’rrethanë ndërkombëtare do lëshonte Ramën për ta këmbyer me Lulin?
– Rama dhe bota treguan më 2019 se zgjedhjet njihen edhe me një parti të vetme. Kështuqë, vjen a s’vjen Basha, i bëhet vonë Ramës apo kryetarit të PD- së?

“Luli – kryeministër” mund të ngrohë çdo suposto që paguhet për të mbajtur fryrë faqen e kryetarit, që në fakt do frymë shumë se çfryn nga të katër anët: që nga çadra e premtimet e kthyera në rrena, tek 17 maji, 22 korriku 2017 ( zgjedhjet në PD), deri tek dalja tafti – bafti nga Kuvendi, ngopja me gaz e demokratëve në sullacot pa kuptim kryeministri – parlament, tek dorëzimi 100% i pushtetit vendor Ramës etj etj etj…POR NUK KA SESI T’I SHESË SAPUNIN PËR DJATHË SHUMICËS SË SHQIPTARËVE QË DUAN LIRI E DEMOKRACI DHE NDRYSHIM SISTEMI!

Një tjetër sqarim i doemosdoshëm: Të qortosh, kritikosh madje edhe të shash Bashën nuk do të thotë aspak se je me Ramën! Ky kurth i skuthëve sahanlëpirës nuk funksionon prej të paktën 2 vitesh, që kur masivisht shqiptarët që kanë lënë vendin dhe shumë prej atyre që kanë mbetur, kanë prova që RAMABASHA ose BASHARAMA është i njejti emër. Është një Olio e Stelio unikë që s’bën dot pa njëri – tjetrin në këtë skenë politike. Kur themi “Basha” kemi thënë “Rama”. Për ta përfshirë tani sërish në argument. Jo patericë, por protezë e Ramës! Fiks si ato filmat me Olion e Stelion, ku i ngjitet një dërrasë në këmbë, ai përpiqet ta shkulë me tjetrën por i ngel aty, provon me dorë por i ngjit në pëllëmbë, ashtu edhe Basha sot është mjeshtër i të marrurit me punë kot për të harxhuar rrëmujshëm kohë me punë boshe! PROTEZË, JO PATERICË! DO MË KUJTOSH!!