Bushati drejt divorcit me Rilindjen/ Bojkoton mbledhjet e Ramës

1 Nëntor 2019, 13:13, Politikë CNA

Situata në Shkodër duket se vijon të jetë mjaft e acaruar për Partinë Socialiste.

Një ditë më parë, deputeti Arben Pëllumbi, njëherazi koordinator i Shkodrës pas përfundimit të mbledhjes me dyer të mbyllura të PS e cila u shoqërua me debate të forta bëri të ditur se struktura drejtuese e PS në këtë qark është shkrirë.

Ndërkohë, ditën e sotme është zhvilluar një tjetër mbledhje për Shkodrën, por ajo që ka rënë në sy është fakti se në mbledhje mungonte ish-ministri i Jashtëm Ditmir Bushati.

Deputeti socialist për qarkun e Shkodrës, Ditmir Bushati nuk ka marrë pjesë në katër apo pesë takimet e fundit.

Nisur nga kjo situatë, duket se ka vetëm dy alternativa. Tani ose Ditmir Bushati nuk njoftohet nga kryeministri dhe stafi i tij duke mos e përfshirë më si deputet i veriut gjë që Rama nuk ka lluksin ta bëjë për shkak të situatës në Shkodër, dhe e dyta është fakti se mund të jetë ai vetë që ka vendosur ta braktisë përfundimisht rrugën e Rilindjes.

Por, përtej dy alternativave të mëspipërme, fakti është se Ditmir Bushati nuk ka marrë pjesë në mbledhje. As në atë me PS-në e Shkodrës, me të deleguarin Pëllumbi dhe deputetët e tjerë të qarkut dhe as në mbledhjen e sotme.

Pra, mospjesëmarrja e Bushatit në mbledhjet e kohëve të fundit tregon që ose e kanë dëbuar ose ai ka filluar bojkotin, por do të duhet pak kohë për të mësuar të vërtetën.

Ndërkohë, burime nga PS i thanë CNA.al se mesa duket Bushati është duke u distancuar shumë nga zgjedhjet dhe lëvizjet e Ramës në veri të Shqipërisë.

Kujtojmë këtu se Ditmir Bushati, pas gjashtë vitesh në detyrë, u shkarkua si ministër i Jashtëm nga kryeministri Edi Rama në fund të dhjetorit të vitit 2018 dhe në vend të tij emëroi Gent Cakajn. Dhe gjithçka erdhi pas qëndrimeve kritike që Bushati kishte mbajtur ndaj Ramës, sa i takon ndryshimit të kufijve të Kosovës.

Nga ana tjetër, kohët e fundit në media është përfolur edhe për një mundësi që Ditmir Bushati do t?i bashkohet Vetëvendosjes së Albin Kurtit, por kjo duket të jetë më shumë fantazi mediatike, sesa një lëvizje politike./ CNA.al