Besnik Muçi sërish në Vetting/ Zbardhen dyshimet e ndërkombëtarëve

1 Shtator 2019, 14:41, Vetingu CNA

Ashtu si për të gjithë edhe për Komisionin e Pavarur të Kualifikimit dhe Kolegjin e Posaçëm të Apelit pushimet e verës kanë mbaruar dhe tashmë vijnë me një axhendë të ngjeshur.

Në kalendarin e publikuar në faqen zyrtare në internet Kolegji i Posaçëm i apelit e nis punën me një çështje të shpejtë, që lidhet me emrin e Besnik Muçit, një prej kandidatëve që ka marrë lejen e Këshillitë të Emërimeve në Drejtësi për anëtar të Gjykatës Kushtetuese.

Në fakt, Besnik Muçi e ka kaluar një herë vettingun, por duke qenë se emri i tij është ?dyshues? për Operacionit Ndërkombëtar të Monitorimit, ai do i nënshtrohet edhe njëherë këtij procesi, që dihet tashmë se përbëhet nga ekspertë të Shteteve të Bashkuara të Amerikës dhe Bashkimit Europian, shkruan Shqip.

Sipas burimeve, për Muçin kriteri i pasurisë është më i diskutueshme, për të cilin është ankuar edhe Komisioneri Publik. Besnik Muçi, prokuror në Prokurorinë pranë Gjykatës së Shkallës së Parë për Krime të Rënda, Tiranë, do të përballet të martën me Komisionin e Posaçëm të Apelimit, pasi sipas rekomandimeve të ONM, huatë dhe kursimet e Prokurorit të Krimeve të Rënda Besnik Muçi nuk ishin të provuara e për pasojë të ardhurat e tij duhej të konsideroheshin të pajustifikuara. Po ashtu, toka bujqësore e përfituar nga bashkëshortja duhej të konsiderohej ?mosdeklarim?.

Ankimi për Kolegjin e Posaçëm të Apelimit, nga Komisioneri Darjel Sina, kryesisht është fokusuar në mosverifikimin e plotë nga KPK të ligjshmërisë së të ardhurave nga huatë e deklaruara prej Muçit dhe në faktin që është përdorur një standard i ndryshëm në çështje të tjera të ngjashme.

Komisioneri po ashtu pretendon se KPK nuk ka vlerësuar drejt sa i përket mosdeklarimit nga bashkëshortja e Muçit të tokave arë dhe një pjese takuese truall në shtëpinë e prindërve. ?Komisioneri Publik, ndryshe nga përfundimet e Komisionit për vlerësimin e pasurisë së subjektit të rivlerësimit, bazuar në aktet e administruara për këtë qëllim, vlerëson se subjekti nuk arrin të justifikojë bindshëm burimin e ligjshëm të pasurive, si dhe gjendet në kushtet e mosdeklarimit të tyre?, thuhet në ankimin e Komisionerit Publik.

Trupa gjykuese për këtë rast do të kryesohet nga Sokol Çomo, ndërsa relator do të jetë Ardian Hajdari. Anëtarë do të jenë Albana Shtylla, Natasha Mulaj dhe Rezarta Schuetz.

Muçi u konfirmua në detyrë nga KPK në gusht 2018, pas hetimit administrativ nga treshja e kryesuar nga Lulzim Hamitaj me relator Olsi Komicin dhe anëtare Brunilda Bekteshin, e cila arriti në përfundimin se ai mund të konfirmohej, megjithëse u gjetën disa pasaktësi në deklarimin e pasurive.

Besnik Muçi ka nisur karrierën në vitin 2002 si prokuror në Tiranë ndërsa para se të kalonte në prokurorinë e krimeve të rënda ka punuar për një periudhë kohe në Policinë e Shtetit si drejtor i Krimit Financiar. Ai është kandidat për të qenë anëtar i Këshillit të Lartë të Prokurorisë.