S'ka demokraci brenda partive/ Zyrtari amerikan, "dajak" opozitës për djegien e mandateve

7 Gusht 2019, 18:06, Aktualitet CNA

Sot Robert Hand, Këshilltari i Komisionit Amerikan të Helsinkit, ishte i intervistuari i rradhës i radios “Zeri i Amerikës”, ku si temë ka qenë situata në Shqipëri dhe shkaqet që e mbajnë ende gjallë krizën e mbjellë nga paaftësia e klasës politike. Por edhe lëvizjet e opozitës që para mospjesëmarrjes në zgjedhjet vendore ndërmorri hapin e braktisjes së parlamentit dhe djegies së mandateve.

I pyetur rreth produktivitetit të aplikimit të kësaj stategjie z.Hand dha përgjigjen e mëposhtëme:

“Unë e shikoj këtë nga këndvështrimi se punoj për 18 anëtarë të Kongresit. Përgjithësisht, anëtarët e Kongresit këtu nuk besojnë se bojkotimi i parlamentit është një ide e mirë. Dhe ky nuk është thjesht një bojkot i përkohshëm, por lëshimi i mandateve pa asnjë mjet për rikthim. Kështu që, unë mendoj se ishte një veprim shumë kundërproduktiv, po të kesh parasysh edhe kohën kur u bë. Kjo mund të jetë kundërproduktive për opozitën edhe për sa i përket mbështetjes që ajo merr. Përpiqem të kërkoj shpresë kudo që mundem, dhe më dha zemër fakti që brenda partive opozitare pati disa mospajtime për këtë. Tre deputetë të parlamentit qëndruan në Parlament, nuk i braktisën mandatet e tyre dhe të tjerë nga listat e partive, hynë në parlament dhe plotësuan shumicën e vendeve të mbetura bosh. Nëse ata mbeten pjesë e Partisë Demokratike ose e LSI-së dhe kthehen përsëri aty, mbase mund të përpiqen t?i reformojnë këto parti.

Një pjesë e problemit me Shqipërinë, mendoj se është fakti që nuk ka demokraci të mjaftueshme brenda partive. Ne nuk mund t’i detyrojmë partitë të jenë më demokratike. Kjo varet prej tyre, por sigurisht që do ta ndihmonte vendin në aspektin e udhëheqjes së përgjegjshme. Disa nga këta njerëz dhe me duket se disa tashmë e kanë bërë një gjë të tillë, kanë vendosur të fillojnë vetë lëvizje të reja apo parti të reja. Mendoj se Shqipëria, në planin afatgjatë do të përfitonte me siguri nga kjo. Populli i Shqipërisë do të përfitonte nëse gjatë zgjedhjeve në të ardhmen do të kishin më shumë alternativa në kutinë e votimit”./CNA.al