Një parti e re në horizont/ Meta “uzurpon” opozitën, “zhduk” Bashën dhe Kryemadhin

30 Korrik 2019, 10:06, Aktualitet CNA

Ilir Meta ka gjetur të gjithë hapësirën e tij, të cilën po e kërkon me këmbëngulje prej disa muajsh, për të qënë në fakt jo presidenti i Republikës, por shpejt lideri i opozitës shqiptare.

Ish-kreu i LSI-së, i cili ka qeverisur edhe me Berishën edhe me Ramën, i zgjedhur me votat e socialistëve president, ditë pas dite, në çdo veprim apo aksion të tij politik ka sjelljen e një lideri opozitar, duke sfumuar së tepërmi sjelljen e Lulzim Bashës dhe veprimet e tij politike.

Meta është më agresiv se kryetari i PD-së, është më i zjarrtë në politikë dhe prek pikat më të ndjeshme, duke ecur në një rrugë përballje me kryeministrin Rama nga zyra, në një mënyrë të qetë, por shpesh edhe duke treguar se është i gatshëm të shkojë përtej ?qetësisë dhe dashurisë?, që ai e ka reklamuar dikur.

Ilir Meta ka dalë nga terreni i tij si president, por ka dalë edhe nga terreni i tij si ish-kryetar i LSI-së. Ai ka hyrë në territorin e plotë të opozitës, duke ?uzurpuar? rolin e liderit të saj, të cilin ka tentuar ta bëjë Lulzim Basha, por nuk ka mundur. Apo shpesh ka luftuar ta ketë nën kontroll edhe vetë kryetarja e LSI-së, Monika Kryemadhi.

Por, çfarë po ndodh?

Sapo Rama del në një konferencë shtypi, Ilir Meta i përgjigjet. Sapo opozita bën një veprim, Ilir Meta bën një veprim tjetër edhe më të rëndësishëm përballë akteve të opozitës.

Pra, luan si i pavarur duke hyrë në terren si opozitar, duke u përplasur me kryeministrin, për të thënë se ai është atje, ai është një faktor kryesor që ka përfituar shumë edhe nga terreni që i është ofruar edhe nga Lulzim Basha, por ndoshta edhe nga një marrëveshje me liderin historik të demokratëve, Sali Berisha.

Sot, Meta duket se ka oazin e tij të betejës përballë kryeministrit, me një aksion politik të qartë, duke pritur që ta shkarkojnë si president dhe me një hap të mëtejshëm që do të ishte lideri i opozitës shqiptare.

Tentativë të cilën po e bën çdo ditë, dhe duket se Ilir Meta në mendjen e tij ka planin që të ndërtojë një parti tjetër, ta shkrijë LSI-në dhe një forcë e re politike të lindë përtej saj.

Pra, të jetë më e madhe se LSI-ja, duke thirrur çdo rrymë tjetër opozitare, duke thirrur edhe aleatët, të cilët sot i kontrollon dhe i komandon Partia Demokratike dhe Lulzim Basha.

Meta ndoshta po ecen drejt hapit të sigurtë për të marrë kontrollin e opozitës, duke parë edhe paaftësinë e Lulzim Bashës, duke parë edhe faktin se ai nuk po mundet dot kurrë të luajë rolin e liderit. Këtë paaftësi, Ilir Meta po e shfrytëzon në maksimum për t?u bërë nesër një kryetar dhe lider opozite, duke sjellë një forcë të re politike, duke sfumuar edhe më shumë Partinë Demokratike dhe duke u përballur si kryetar opozite nesër, si një president i shkarkuar apo me detyrë të përfunduar./ CNA.al