E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Udhëtim me avokatin e të pandehurit/ Hije skandali mbi profesionalizmin e Gentian Osmanit

23 Korrik 2019, 13:55, Aktualitet CNA

Prokurori për Krime të Rënda dhe njëherësh anëtari i KLP-së Gentjan Osmani do të ketë një tjetër përballje nesër me Kolegjin e Posaçëm të Apelimit.

Osmani është zhvendosur në shkallën e dytë të Vettingut, pas ankimit të paraqitur nga Komisioneri Publik kundër vendimit nr. 61, datë 02.08.2018 të Komisionit të Pavarur të Kualifikimit që lidhet me procesin e rivlerësimit kalimtar.

Trupi gjykues i kësaj çështjeje kryesohet nga Natasha Mulaj dhe anëtarë janë Albana Shtylla, Ardian Hajdari dhe Rezarta Schuetz. Relatore është Ina Rama.

Në seancën e kaluar të datës 15 Korrik 2019, Komisioneri Publik u shpreh lidhur me përmbajtjen e provave, ndërsa subjekti i rivlerësimit deklaroi se i qëndron kundërshtimeve ndaj ankimit të Komisionit Publik, të parashtruara edhe më herët.

Trupi gjykues i vuri në dispozicion Komisionerit Publik dhe prokurorit Gentjan Osmani të dhënat e aksesuara nga sistemi TIMS dhe informacionin që Prokuroria e Përgjithshme i dërgoi zyrtarisht Kolegjit, me kërkesë të këtij të fundit, në funksion të hetimit mbi një denoncim.

Bëhet fjalë për një denoncim ku pretendohet se Osmani ka udhëtuar jashtë vendin me avokatin e një prej të pandehurvve.

Pasi u njoh me këto informacione, Komisioneri Publik deklaroi se denoncimi nuk është i bazuar në fakte, pasi asnjë e dhënë e tij nuk përkon me të dhënat e ardhura në rrugë institucionale.

Por Osmani, raportojnë mediat e ka pranuar këtë udhëtim, ndërsa Prokuroria e Përgjithshme në raportin dërguar KPA-së, e ka mohuar.

Nga ana e tij, Osmani i qëndroi kërkesës për kryerjen nga ana e Kolegjit të një analize financiare bazuar në provat e depozituara.

Më tej trupi gjykues vendosi se do të kryejë analizë financiare në funksion të zgjidhjes së çështjes, duke konsideruar dhe vlerësuar të gjitha provat e administruara në këtë proces.

Konkluzionet nga palët përkatëse priten të jepen nesër e më pas KPA do të dalë me vendimin përfundimtar për subjektin Gentjan Osmani./CNA.al