Kush i dogji mandatet e opozitës dhe ku po shkon PD-ja?!

1 Korrik 2019, 10:59, Aktualitet CNA

Pas pesë muajsh betejë, përplasje, akuza dhe molotov, ditën e djeshme Shqipëria mbajti zgjedhjet për pushtetin vendor.

Por ndërkohë kemi dy fytyra. Atë të zgjedhjeve që u zhvilluan dhe atë të Lulzim Bashës, i cili shpalli fitoren.

Por, kemi edhe një reagim nga ndërkombëtarët, i cili e çoi PD-në nga një ?bishë?, në një ?lepur?. Dhe gjithçka duket se fillon me djegien e mandateve dhe largimin e opozitës nga parlamenti, dhe reagimi i ndërkombëtarëve. Shtetet e Bashkuara të Amerikës, por edhe partnerëve të tjerë europianë të Shqipërisë.

Gjithçka fillon tek vendimi i Lulzim Bashës për të djegur mandatet dhe për të thënë se nuk kishte më punë në parlament dhe duke dalë nga sistemi.

Veproi njëlloj si një ekip futbolli që braktis ndeshjen dhe bashkë me tifozët shkon në tribunë për të parë ndeshjen, ku më poshtë pala tjetër vazhdon e bën gola 10, 11, por kjo s?ka rëndësi, sepse kundërshtari e ka fituar në tavolinë ndeshjen.

Gjithçka fillon tek dalja nga parlamenti dhe djegia e mandateve. Dhe për këtë fakt, duhet të ketë përgjegjësi, të cilat nuk fillojnë vetëm tek Lulzim Basha, por duhet parë edhe përtej tij. Sepse Lulzim Basha është ai që është dhe këtë e dinë të gjithë. I paaftë, i papeshë në politikë dhe i pabesueshëm për shqiptarët. Një pazarxhi i vogël dhe një dështak i paepur.

Këtë e panë të gjithë, kur tha se zgjedhje me Edi Ramën kryeministër nuk do të kishte, por zgjedhjet u mbajtën dhe Edi Rama vijon të jetë kryeministër.

Dhe përtej Lulzim Bashës, koka duhej të ishte kthyer tek politikanët e vjetër të PD-së dhe tek aleatët e saj . Pa e drejtuar gishtin, por duke kërkuar të paktën përgjegjësinë.

A ka qënë dakort Sali Berisha me djegien e mandateve, ish-kryeministri i vendit, ish-kreu i PD-së dhe lideri historik i demokratëve?

Ai e ka thënë publikisht se e ka pranuar këtë vendim, por a ka qënë ai pjesë e këtij vendimi? A ka folur? Sepse Berisha e mban mend shumë mirë se cili ka qënë raporti i OSBE-ODIHR-it në vitin 1996, kur socialistët i braktisën zgjedhjet. Edhe atëherë ndërkombëtarët i akuzuan socialistët së shkatërruan procesin zgjedhor dhe nuk e pranuan daljen e tyre nga sistemi. Pra, një precedent ishte.

Le të shkojmë më tej. Kur e kanë pranuar bojkotin ndërkombëtarët?

Sali Berisha ka qënë kryetar i PD-së dhe sa herë që opozita bënte bojkot, gjithmonë beteja e ndërkombëtarëve ishte që palët të kthehen në parlament, që beteja bëhej aty.

Mund të ?rraheshe?, mund të humbisje, por duhet të qëndroje aty, derisa kundërshtari të ishte më i dobët dhe të fitoje.

A mund të pranohet që të mos ketë folur për djegien e mandateve Dashamir Shehi, një politikan karriere, prej 30 vitesh në politikë. E në rast se ka qënë pro, duhet të pranojë dështimin edhe ai, bashkë me Lulzim Bashën. Në të kundërt, duhet të ishin ndarë nga ky akt, ose duhet të mbajë përgjegjësi sot, ashtu si edhe Sali Berisha.

Nuk i falet Monika Kryemadhit djegia e mandateve. Nuk është një politikane e re, por është një politikane karriere.

Nuk i falet as vetë Lulzim Bashës, në qoftë se ka qënë vendim personal i tij.

Por ata duhet ta ndajnë me të dhe të mbajnë përgjegjësi, ashtu sikundër Lulzim Basha.

Kjo për politikanët që kanë eksperiencë. Përfshirë këtu edhe Fatmir Mediun, që ka edhe lidhje të forta ndërkombëtare dhe sillet si një njeri me talent të veçantë për të njohur senatorë, ambasadorë, etj.

Të paktën këta emra që ne përmendem më lart, nuk e dinin se cilat do të ishin pasojat e djegies së mandateve?

Vajtja tek arbitri për të gjykuar një ndeshje, ku t’i nuk do të hyje në fushë, kjo është aventura e radhës e Lulzim Bashës, në bashkëpunim me shumë të tjerë, të cilët sot nuk mund të dalin dhe të thonë se ?ne nuk kemi qënë dakort dje?.

Pse nuk u ndanë nga Lulzim Basha dje, nëse nuk ishin dakort, por e çuan opozitën në këtë situatë?

Tashmë ka ardhur koha për një reflektim të fortë, jo vetëm ndaj Lulzim Bashës, por edhe ndaj çdo kujt tjetër që e mbështet. Dhe në heshtje, çdo gabim, faj dhe përgjegjësi e pranon ndoshta në parim në kurriz të demokratëve, të shkatërrimit të PD-së, dhe të atyre militantëve që sot dergjen burgjeve, të braktisur nga Lulzim basha, i cili sot turpësisht shpall fitore një humbje. Shpall sot fitore disfatën më të madhe historike të opozitës.

Sot, PD-ja nuk do të ketë më asnjë bashki, ashtu siç nuk do të ketë më deputetë, pas vendimit për djegien e mandateve. Por, duhet të kënaqet me disa kryepleq fshatrash, apo Avokaten e Popullit, që e ka zgjedhur nga familja.

Kush mban përgjegjësi në këtë moment? A duhet analizë dhe reflektim konkret për këtë moment, për të korrigjuar gjithçka ka ndodhur?

Në të kundërt nesër do të jetë shumë vonë./ CNA.al