Grushta "rilindasish" mbi ish kryetarin e PS-së

5 Maj 2019, 20:14, Aktualitet CNA

Një ngjarje e rendë kriminale është raportuar se ka ndodhur pas mbledhjes së Asamblesë së socialistëve, në qendër të të cilës ishte përzgjedhja e kandidatit për kryebashkiak. Ngjarja në fjalë ka ndodhur brenda ambienteve të një prej lokaleve të Bashkisë së Urës Vajgurore .

Në mbledhjen e Asamblesë ka qenë i pranishëm, si i deleguar nga qendra e PS-së ministri Blendi Klosi, prania e të cilit nuk e ka ndalur konfliktin e nisur sapo emri i krybashkiakes në detyrë, Juliana Memaj, është ripropozuar për të qenë sërish në këtë post.

Emri i Juliana Memajt për të qenë sërish në krye të Bashkisë së Urës Vajgurore mesaduket ka qenë i projektuar nga Selia qëndra e “rilindasve”, pasi është përkrahur edhe nga i deleguri Klosi, ndërkohë që është kundërshtuar nga një grup socialistësh të bazës. Gjë që ka ndezur debate të ashpra, veçanërisht pasi këta të fundit kanë hedhur mbi tryezë dy emra për të qenë garues në vend të Memajt.

Emrat e propozuar kanë qenë Fatli Afilaj, aktualisht kryetar i këshillit të Qarkut Berat, dhe Isuf Baze, inspektor në DAR, Berat. Por ndërsa për të shuar kundërshtitë janë nxjerrë jashtë takimit gjithë socialistët, jo anëtar të Asmblesë, kjo nuk e shmangur thellimin e mëtejshëm të incidentit të finalizuar me rrahjen e ish kryetarit të PS-së, Poshnje, Ramadan Baho.

Sikurse ka konfirmuar BallkanWeb, rrahësit e Bahos kanë qenë dy punonjës të Bashkisë së Urës Vajgurore.

I pari Muharrem Selenica, punonjës i Shërbimit Pyjor dhe Berti Memaj, me detyrë shofer dhe xhaxha i kryebashkiakes në detyrë. Pasi e kanë kërcënuar ish kryetarin socialist të Poshnjes, Ramadan Baho, duke e bërë përgjegjës për propozimin e dy emrave dhe konfliktin në mbledhjen e Asamblesë, ata kanë derdhur dhunë mbi të e janë larguar…

Rrahja ka ndodhur pas përfundimit të mbledhjes, në një nga lokalet e qytetit të Urës-Vajgurore. Ramadani ka bërë denoncim në Komisariatin e Policisë së Urës Vajgurore, por ajo që të bën përshtypje është fakti se kur vjen fjala për mendim ndryshe edhe socialistët e “Rilindjes” nuk ngurrojnë të derdhin grushta e shkelma për të të bindur të jesh pjesë e vendimeve të kryesisë “rilindase”.

Gjë që e ka pohuar edhe i rrahri Baho, kur në prononcim ka thenë se anëtarët e PS-së në Urë-Vajgurore, kanë unitet mes tyre dhe të gjithë bashkë kanë kundërshtuar kandidaturën e Juliana Memajt, për një mandat të dytë në drejtimin e Bashkisë së Urës-Vajgurore./CNA.al