Reportazh-Si në mesjetë/ Rama izolon qytetin e Burrelit

4 Maj 2019, 13:23, Aktualitet CNA

Çdo ditë kryeministri Edi Rama, zgjohet me ëndrrën e Shqipërisë Evropiane. Me video propagandon reklamon pjesë të ndryshme të Shqipërisë nga rrjetet sociale.

Sigurisht vetëm, ato vende që në objektivin e kamerës Rilindjes, duken bukur, ndërkohë, që pjesa më e madhe e Shqipërisë, është në varfëri, mjerim dhe e shkatërruar.

Shqipëria, nuk është Tirana, Durrësi, apo disa pika turistike që propagandon Rama.

Pjesa tjetër e Shqipërisë, para së cilës Rilindja dhe kryeministri mbyllin sytë, është e shkatërruar.

Shqipëria është edhe Burreli, ku rruga që përshkon për të arritur deri atje është e shkatërruar.

Varfëria e këtij qyteti ulëret me të madhe. Qytetarët e Burrelit dhe të fshatrave përreth janë braktisur nga Rilindja.

Janë braktisur se nuk kanë rrugë dhe në një vend që mungon infrastruktura nuk ka jetë dhe zhvillim.

Nëse udhëtojmë nga Tirana për në Burrel, deri tek rruga që të shpie tek kthesa e Ulzës, asfalti duket më i mirëmbajtur.

Ndërsa sapo kalon kthesësn e Ulzës dhe nisesh në drejtim të fshtrave, Bushkash, Stojan, Baz dhe deri në hyrje të Burrelit, rruga është lënë në mëshirë të fatit.

Gropa të mëdha, të cilat në ditët me shi, bëhen burim aksidentesh përshkojnë gjithë segmentin nga kthesa e Ulzës deri në Burrel.

Bëhet fjalë për 20 km rrugë, ku edhe kafshët shtëpiake e kanë të vështirë të kalojnë dhe jo më automjetet.

Edhe pse rruga Skuraj – Burrel – Peshkopi është dhënë me konçension për mirëmbajtje me një vlerë rreth 20 milion euro, deri tani nuk është mbyllur as edhe një gropë.

Të paktën në aksin Skuraj-Burrel, situata është tejet e rëndë, duke çuar kështu në izolimin e qytetit.

Në ditët me shi, situata bëhet më e rëndë, ndërsa në ditët me diell të mbulon pluhuri.

Rama “kërcet” dhëmbët me propagandë, qytetarët kërcasin makinat në gropa dhe gurë, të sëmurët rrezikojnë të vdesin në rast se iu duhet ndihmë e specializuar në Tiranë.

Gropat me thellësi prej me shumë se 20 centimetër, nuk ka ambulancë që i kalon me shpejtësi në rast urgjence. Në këto rrethana, pacientët e sëmurë rëndë dhe që kërkojnë mjekim të specializuar mund të humbin edhe jetën.

Mirë që është rregulluar qendra e qytetit, por askush nuk e ka menduar se si mund të arrihet deri atje, kur nisesh nga Tirana po nga Durrësit.

Kur është në një gjendje të tillë rruga nacionale, nuk imagjinohet se si janë rrugët që lidhin Burrelin me fshatra apo qytetet të tjera si Klosi dhe Peshkopia.

Jemi në prag të zgjedhjeve lokale dhe kryeministri e ka nisur turin “Bashkia që duam”.

Sigurisht që kryeministri do të jetë i detyruar të shkojë edhe në Burrel, aty ku qytetarët luftojnë çdo ditë me varfërinë dhe papunësinë.

Por, vetëm nëse do të zgjedhë të udhëtojë me “mushkonjat e Divjakës apo të Ishmit”, pasi nëse do të niset me makinë edhe pse të blinduar, do t’ia prishin retë e tymit propagandën.

CNA.al po sjell fotot e mëposhtme, duke i kërkuar ndjesë kryeministrit Rama dhe Rilindjes që po ia prishim fundjavën me Shqipërinë e vërtetë./ Etleva Skonja