Ndryshimet kushtetuese të bëhen me referendum/ Basha i kundërpërgjigjet Ramës

2 Maj 2019, 09:42, Aktualitet CNA

Kreu i PD-së Lulzim Basha reagoi menjëherë publikisht pas fjalimit të kryeministrit Edi Rama, i cili foli për ndryshimet në Kodin Penal.

Basha ndër të tjera tha se “ndyshimet në Kushtetutë, të cilat ndikojnë drejtëpërdrejtë mbi jetën e njerëzve duhet të sanksionohen përmes një referendum kombëtar. Ky debat duhet të përfshijë të gjithë palët”,- tha Basha.

Kryedemokrati foli gjithashtu edhe për kapjen e shtetit nga krimi dhe për ngërçin politik .

“Si kurrë më parë nuk ka Gjykatë Kushtetuese. Jemi në kushtet e një kolapsi total në politikë dhe ekonomi pasi nuk ka qeveri legjitime dhe institucione të së drejtës.

Nuk do të lejojmë që krimi të bëj zgjedhje në Shqipëri. Kjo qeveri nuk ka ardhur në pushtet nga vota e lirë, por nga krimi. Jemi në një krizë politike, institucionale dhe ekonomike,”-tha kreu i PD-së.

Pjesë nga fjala e Bashës:

Jemi sot në një paralizë totale të drejtësisë, që sot si kurrë më parë në ndonjë vend të botës ndodhet në kushtet e mungesës së Kushtetueses, asgjësimit të Gjykatës së Lartë, të kapjes së Prokurorisë së Përgjithshme. Për herë të parë shënohen afera që për nga shumat marramendëse. Numri i shqiptarëve të larguar nga vendi në 5 vite të arrijë përmasa të papara që nga fillimi i viteve 90. Kolapsi i ekonomisë ka sjellë shkatërrimin e mijërave vend të punës, nivele mjerimi si në vende të Afrikës, një në 10 shqiptar ushqehen një herë në ditë, shëndetësia dhe arsimi gjenden në krizën më të thellë.

Ka dy arsye, kjo qeveri dhe pseudomaxhorancë nuk ka ardhur si produkt i votës së lirë dhe nuk janë përgjegjës para qytetarëve por si bashkëpunim i krimit të organizuar dhe shitblerjes së votës me paratë e krimit dhe drogës.

Ndryshe nga sistemi më i thjeshtë demokratik, nuk ka më asnjë kontroll të pushtetit, të gjitha janë në një dorë, parlamenti ilegjitim kontrollohet nga qeveria ilegjitime.

Jemi sot në kolaps total se vendi nuk ka as parlament e as qeveri legjitime dhe pasojat bien mbi shqiptarët e pafajshëm. Cdo skandal do të mjaftonin që qeveria të kishte rënë në cdo vend evropian, që kafazi i të pandehurve të ishte plot me jakat e bardha të kabinetit, në një mega proces që në rastin e unazës duhet të shihte pas hekurave nga ministri te nëpunësi që nënshkroi kontratën me një kompani fantazmë. Por nuk ndodh sa kohë që vota e lirë është asgjësuar, ka sjellë kapjen e drejtësisë, nivele të papunësisë, mjerimit, varfërisë dhe papërgjegjshmërisë totale që shteti e ka për detyrë tu japë shqiptarëve.

Nuk ka të bëjë me reformat e thella politike, por detyrat e qeverisë tranzitore për ti dhënë fund disa praktikave të tmerrshme korruptive që kanë shkatërruar votën e shqiptarëve, në eksperimentin që i hapi rrugë 2017, në zgjedhjet e pjesshme të Dibrës.

Do prezantoj 10 detyrat kryesore që qeveria tranzitore do të ketë për të garantuar zgjedhje të lira e të ndershme, që do vetëm vullnet politik, që kryeministri i qeverisë tranzitore dhe ministrat të jenë jashtë konfliktit të interesit.

Zgjedhje me Ramën nuk do të ketë, zgjedhje pa opozitën nuk mund të ketë, janë farsë, janë tentativë e dështuar, nuk do të lejojmë që krimi të bëjë më zgjedhje në vend. Zgjedhjet do të mbahen pasi të ndëshkohen hajdutët e votave.