Bindja Demokratike garon në zgjedhje/ Patozi: Kundërshtari ynë i vetëm është Rilindja

1 Maj 2019, 11:20, Aktualitet CNA

Kryetari partisë Bindja Demokratike, Astrit Patozi, ka dalë sot në një konferencë për mediat, ku ka deklaruar se kjo forcë politike do të garojë në zgjedhjet e 30 qershorit, me kandidatë në çdo bashki.

Astrit Patozi, deklaroi se Bindja Demokratike do të mbështesë çdo kandidat të pavarur dhe se kundërshtari i vetëm i tyre, është Rilindja dhe PS.

?Vetëm bashkimi i çdo force opozitare do të sjellë rezultat kundër PS-së.

Ne do të mbështesim çdo kandidat të pavarur pa asnjë mëdyshje dhe asnjë prej tyre nuk do të ketë asnjë detyrim ndaj Bindjes Demokratike.

Kundërshtar i vetëm i Bindjes Demokratike është Rilindja dhe PS, si përgjegjësi kryesor për keqqeverisjen?-tha ndër të tjera Astrit Patozi.

Deklarata e plotë:

MIRËSEVINI NË SHTËPINË E LIRISË!

Përshëndetje dhe mirë se keni ardhur të gjithë!
Që nga ky çast, ju ftoj të rrini dhe të ndjeheni këtu si në shtëpinë tuaj.
Fakti që sot është 1 maj dhe vetëm ne dhe ju jemi në punë, do të thotë se e kemi shumë seriozisht këtë gjë.
Bindja Demokratike ju uron mirëseardhjen, duke ju falenderuar shumë për vëmendjen ndaj saj. Ne ju garantojmë që sot se kemi vendosur të jemi shtepia e lirisë, duke qenë të bindur se shtypi është aleati dhe bashkëudhëtari ynë kryesor në projektin tonë për të ndryshuar Shqipërinë.
Nga kjo shtëpi nuk do të degjoni kurrë fjalet “kazan”, “Kadri”, apo epitete të tjera fyese dhe përçmuese për gazetarët dhe mediat, ku ata punojnë, cilido qoftë pozicioni i tyre ndaj BINDJES. Prej nesh nuk do t’ju vijnë kurrë kërëcënime, shantazhe apo përpjekje për të blerë zërin apo heshtjen tuaj.
Prej nesh nuk do të dalin kurrë padi gjyqësore ndaj gazetarëve edhe sikur ata ta teprojnë me shpifje apo akuza ndaj përfaqësuesve tanë. Sepse ne kemi vendosur qysh në ditën e parë të themelimit që trillimeve politike dhe sulmeve të mundshme, t’i përgjigjemi vetëm me të vërtetat tona.
Ndërkohë, kërkoj mirëkuptimin tuaj që sot nuk do të kemi një bashkëbisedim të hapur, të cilin do ta realizojmë shumë shpejt ditët në vazhdim. Për sot mandatin e kam vetëm që të bëj vetëm një njoftim të rëndësishëm për një qëndrim politik BINDJES DEMOKRATIKE./CNA.al