Tentativa për të marrë Prokurorinë e Përgjithshme/ Llalla me kandidat për kryeprokuror

27 Prill 2019, 09:38, Aktualitet CNA

Prokurorja e Apelit, Fatjona Memçaj, ka aplikuar dje pranë Këshillit të Lartë të Prokurorisë, për postin e Prokurorit të Përgjithshëm.

Ndryshe nga kandidatët që kanë aplikuar deri më tani, për postin e Prokurorit të Përgjithshëm, Memçaj e ka kaluar Vettingun, pasi rezultoi e pastër në të tria kriteret.

Në vitin 2003, Memçaj ka mbajtur postin e prokurores së rrethit në Tiranë, ndërsa në vitin 2007, ajo ka punuar si drejtoreshë e Koordinimit Ligjor në Presidencë, në kohën kur ky institucion udhëhiqej nga Bamir Topi.

Këtë detyrë ajo e ka mbajtur deri në fund të vitit 2012.

Më tej, Memçaj është emëruar drejtore kabineti në Prokurorinë e Përgjithshme e cila në atë kohë drejtohej nga Adriatik Llalla dhe prej vitit 2013 mban pozicionin e prokurores së Apelit në Tiranë.

Kandidatja për Prokurore të Përgjithshme është lakuar si një nga prokuroret e përkrahura nga Adriatik Llalla.

Kujtojmë se në janar të vitit 2017, ish-Prokurori i Përgjithshëm Adriatik Llalla i ka dërguar Sekretares së Përgjithshme të Kuvendit Albana Shtylla, listën emërore të prokurorëve që plotësojnë kushtet ligjore për të qenë anëtarë të Këshillit të Emërimeve në Drejtësi sipas nenit 220 dhe 221 të ligjit nr. 115/2016. Një ndër emrat ishte edhe prokurorja Fatjona Memçaj.

Por nuk është vetëm ky rasti që tregon se Memçaj ka pasur përkrahjen e Llallës.

Pasi bashkëshorti i saj, Dashamir Alsula rezulton se ka qenë ndihmës ligjor i ish-kryeprokurorit Adriatik Llalla, gjatë periudhës prill-dhjetor të vitit 2016.

Referuar të gjitha këtyre të dhënave, duke se ish-prokurori i përgjithshëm Adriatik Llalla i cili është nën hetim, ka një kandidat për ta dërguar në kupolën e akuzës.

Me pak fjalë i bie që Llalla të marrë sërish në drejtim Prokurorinë e Shtetit.

Ndërsa, sa i përket pasurisë, sipas hetimeve të Vettingut Memçaj ka rezultuar e pastër.

Në vitin 2003, pasuria e saj familjare shkonte në 3.3 milionë lekëve, ndërsa në fund të vitit 2016, pasuria e saj shkonte në vlerën e 6.1 milionë lekëve ose 1.8 herë më e lartë.

Në viti 2016, dhe vetëm me pagën e saj dhe të bashkëshortit, prokurorja Memçaj, rezultonte me kursime mbi 10 mijë euro, dhe me gjashtë gjendje llogarie./CNA.al