Liria e medias/ Meta bën apelin e fortë

18 Prill 2019, 13:50, Aktualitet CNA

Presidenti i Republikës, Ilir Meta, në një postim në rrjetet sociale ka reaguar në lidhje me konkluzionet e nxjerra nga organizata botërore e gazetarëve ?Reporterët pa Kufij?.

Shqipëria ka zbritur me 7 vende në Indeksin Botëror të Lirisë së Medias dhe për këtë Meta shkruan se është një kambanë alarmi për politikën shqiptare dhe për ecurinë e Shqipërisë në BE.

Sipas Metës, liria e medias është jetike për garantimin e llogaridhënies nga të gjitha institucionet publike.

Më tej Presidenti ka bërë apel që të gjithë autorët e krimit që kërcënojnë përfaqsuesit e mediave të vihen përpara drejtësisë.

Postimi i plotë:

Me shqetësim të thellë përcolla sot konkluzionet e organizatës botërore të gazetarëve ?Reporterët pa Kufij?, për regresin e Shqipërisë në raport me lirinë e medias.

Zbritja me 7 vende në Indeksin Botëror të Lirisë së Medias dhe paralajmërimi serioz i këtij raporti se ?rruga e Shqipërisë për në Bashkimin Europian është e gjatë?, është një këmbanë e fortë alarmi që duhet të na zgjojë të gjithëve.

Angazhimi i institucioneve dhe i shoqërisë në përkrahje të lirisë së të shprehurit është tregues për demokracinë, qeverisjen e mirë dhe përgjegjësinë publike në vend.

Nuk duhet të harrojmë se liria e të shprehurit është e drejtë themelore e njeriut dhe shtyllë e pazëvendësueshme e jetike për një shoqërie moderne demokratike.

Neni 49 i Traktatit të Lisbonës e përcakton qartë garantimin e lirisë së shprehjes dhe një vend i cili synon t?i bashkohet BE-së duhet të respektojë garantimin e saj.

Liria e medias është jetike për garantimin e llogaridhënies nga të gjitha institucionet publike.

Në mënyrë të përsëritur kam dënuar me ashpërsi të gjitha sulmet dhe çdo akt dhune ndaj gazetarëve, që fatkeqësisht janë shpeshtuar kohët e fundit.

Sërish apeloj me forcë që autorët e krimeve ndaj përfaqësuesve të medias të vihen menjëherë para drejtësisë dhe t?i jepet fund shantazhit, intimidimit apo çdo lloj tjetër presioni ndaj tyre.

Shpreh solidaritet të plotë me gazetarët e cënuar në misionin e tyre në shërbim të lirisë, të qytetarëve dhe në interes të konsolidimit të të gjithë sistemit tonë demokratik./CNA.al